慶回歸12周年，特區政府論功行賞，噚日公佈委任多名太平紳士（JP），《南華早報》老總劉志權CK都榜上有名。《南早》另一高層、資深編輯楊健興（Chris）剛辭職，CK就獲政府封JP，有《南早》行家同八方講，兩個消息接踵而至，真係百般滋味在心頭。
月前已經辭職而即將離開《南早》嘅CK行走江湖多年，據講對呢啲虛銜已達心如止水境界，既然JP冇實務，頂多一年探監一次，佢亦不想拒人千里，有人話若然好似《星島》老總蕭世和咁攞個銅紫荊，CK反而可能唔制㖭。噚日獲封JP嘅仲包括兩位行會新貴楊敏德、葉維義，幾位富豪第二代李家傑、李民橋、曾智雄亦有份，中大王家英都做咗紳士。