「黑帝」咸姆頓同美國組合PussycatDoll主音妮高近期打得火熱，鬼咁恩愛。最近咸姆頓收到風，原來妮高一直都好想要架保時捷，星期一就拿拿聲去買咗架黑色「波子」畀佢，當做佢31歲嘅生日禮物咁話，到妮高鬼死咁開心。鬼咩？架車成8萬鎊（101萬港元），係人收到都開心啦。唔好以為「黑帝」拎「少少錢」出嚟買完架車就算，人哋仲好有心思，特登配埋個「PCD」嘅車牌畀妮高，你話呢個廿四孝男朋友係咪真係冇得頂先？不過話時話，咸姆頓今季冇咩表現，其實都唔知係咪因為用晒啲時間去諗點樣女朋友，所以先搞到冇心機練車呢？