上季本地波新聞球隊屯門普高，自從護級成功後就冇乜消息，到底呢隊懷疑有球員涉打假波嘅球隊，會唔會繼續留喺甲組角逐，一直係個謎。求大俠前晚同普高關係都幾密切嘅公民會長兼足總董事貝鈞奇傾開，佢就話下季甲組因場地問題，最多只可以10隊角逐，但暫有11隊有資格參賽，咁始終有一隊要「犧牲」，而普高領導層原來已諗緊「犧牲小我，完成大我」，放棄留喺甲組，令足總唔使煩邊隊冇得踢。普高總監任煒雄（右）噚晚冇正面回應，仲講到好鬼「玄」：「暫未同貝生正式傾過，總之大家要互相尊重。」咁屯門普高即係搞定唔搞？佢點都唔肯講。