恒指升緊，但唔多刺激到市場氣氛，好多人仍然失業，新工轉唔到，最快搵工途徑就係揸的士。3年車牌就可報考的士，齋筆試毋須考路面表現，難度唔算高，所以近排交更嘆茶時，見多咗好多生面口嘅行家。有次八卦聽幾個新仔吹水，評論用緊嘅GPS，幾個牌子都彈到暈，錯漏百出兼唔Update。諗番起我十幾年前啱啱入行，唔熟路真係一大問題，不過家有GPS就真係易搞好多，其實莫講話新行家，好多司機專走九龍或港島，一過海都好多路未必識行。唔好以為我老土，我一樣好Buy呢啲科技，試過用都覺得唔錯。嗰幾位新仔鬧爆，應該係貪平買啲幾嚿水鴨記貨色，翻版地圖兼Cheap雞零件，實死火喇！幾時都係一分錢一分貨，4"芒二千蚊左右嘅大牌子都唔止有一個選擇，比雜嘜機更值得信賴。計我話，投資多少少，順風順水執多幾轉好過啦！
文：黃師傅