泛民總動員號召市民今日上街，阿牛曾健成近日忙於打電話做呼籲，社民連中人透露，阿牛日前致電一名姓王市民，因為對方係曾求助苦業主，點知對方反問「咩嘢事？我唔會嚟㗎！」態度極不友善。
由於阿牛同呢位王姓街坊一向老友，何解忽然反目？阿牛睇真啲個電話號碼，先發覺出事，原來打錯電話，此王姓人士係中聯辦部長，並非其街坊老友，叫佢上街，難怪被鬧翻轉頭。動員市民上街卻搭錯線去西環，八方聽聞社民連內部笑到反肚，知情者則話其實呢類政壇搭錯線蝦碌事件並唔罕見，早前灣仔區補選，社民連候選人季詩傑竟然收到左派來電，請佢投票畀對手民建聯鍾嘉敏！