出道兩年嘅陳柏宇以實力唱功見稱，不過佢最為人熟識嘅就係同裕美嘅一段緋聞，近日佢忙於為新專輯《CloseUp》宣傳，佢首新歌《Iwillbelovingyou》仲喺巴士RoadShow唱到街知巷聞。上月20日陳柏宇喺大埔新達廣場舉行咗一個新碟簽唱會，有網民將佢當日落力演唱嘅片段放上YouTube（ http://www.youtube.com/watch?v=QT6HgwX8_RQ）畀大家欣賞。
聲稱褲頭叠起咗
點知有眼利嘅網民發現着格仔褲嘅陳柏宇喺台上獻唱新歌《你瞞我瞞》時，下體竟然有異常嘅生理反應，喺香港討論區嘅網民仲統計佢下體出現奇怪現象竟歷時近兩分鐘，有口痕網民就抵死話唔知陳柏宇係咪因為見到緋聞女友裕美先有咁「凸」出嘅反應。
馮仁昭第一時間上網睇過條片，片中陳柏宇忽然激凸，唱到中段時，佢好似發現自己有啲唔妥，忽然單手插袋交叉腳行咗幾步，好鬼礙眼。
事後記者透過唱片公司聯絡陳柏宇，佢話因為條褲嘅問題，至於係唔係因為諗起裕美時，佢就話：「黐線，當時我好專注唱歌，冇諗其他嘢，不過我都會上網睇番段片，其實係條褲個褲頭叠起咗，所以如果起身坐低，就會有呢個問題，唔係生理反應。」