今日7.1大件事，事前果然有異象，上環噚日無端端爆水管，搞到地陷出現大咕窿，另一邊港島東則有大地震，老牌英文報章《南華早報》資深編輯Chris楊健興忽然辭職，而且即時生效，八方聽聞Chris噚日下晝未收拾細軟就離開辦公室。
有傳搵新加坡人進駐
Chris喺《南早》工作四分一世紀，長期跑政治新聞，係極資深新聞從業員，香港政界無人不識，所以佢辭職消息不但震動整個編採部，連議員、官員都感到意外。Chris噚日下午向同事發電郵道別，第一句就話：Thetimehascome.
在電郵中，Chris冇說明辭職原因，只表示離職比預期中早了一點，雖然若有所失，但認為係適當時間。佢冇透露未來動向，話會休息數個月陪伴家人；熟識Chris人士稱，佢噚日辭職後表現輕鬆，今日會到維園擺檔賣《人民不會忘記》。
《南早》人事大地震可能只係第一波，早前有傳大老闆郭家擬搵新加坡資深傳媒人進駐，據稱總編輯劉志權月中離任，連續有兩個高層起身，令人關注呢份老牌報紙日後編輯方針。《南早》中人稱，該報近年越來越重視「和諧」，四川大地震一周年多報喜、少報憂，報道六四20周年亦篇幅有限，坡佬加盟相信如魚得水。
亦有人指《南早》流失資深編採人員係意料中事，為節省成本，該報只保留小部份編採部人員在市區，並大屋搬細屋由太古坊遷到禮頓道，其餘人手一律到大埔廠房返工，Chris見大勢如此，趁機會起身實屬明智。佢在《南早》工作25年，八卦者估計其退休金數目十分、十分可觀，大可印印腳做好一段時間familyman。
Chris曾採訪八九民運，今年花好多心機再版《人民不會忘記》，心水清者發現書中撰文嘅記者，仍在傳媒行業嘅不多，家陣佢都唔撈，真係人面全非。Chris今年初當選新聞行政人員協會主席，上一屆關偉當選後被震出亞視，Chris坐上呢個位未夠半年就向老闆遞信，唔通呢個真係三煞位？
mailto:[email protected]