o靚模青春露肉搏命，不但成功在娛樂圈搶灘，最近更入侵名牌社交圈，前晚Lavina和Rainbow等更殺到手袋活動，在賭王千金何超雲、名模樂基兒和謝婷婷等面前，谷胸搶位。至於一身露肩短褲造型的超雲，透露揀男友有4大要求，但深知香港難求，叠埋心水揀老外。
美國手袋品牌Coach前晚在銅鑼灣舉行秋季系列騷，賭王三房長女何超雲、薛凱琪、鄔君梅和化妝師Zing等都有出席，名模樂基兒、謝婷婷、AnaR.和CaraG.等行騷。近期聯群出動，四處露肉搶灘的o靚模，也殺入名牌活動，前晚Lavina和Rainbow等谷胸露腿拗腰搶鏡，還有「翻版徐子淇」鍾浠文（Zeliz）等新晉內地女模。
削腮骨拒Botox
何超雲一身JuicyCouture露肩短褲造型，非常summersexy。她透露家中有數十個手袋，最貴的兩萬多元。早前有指其妹超蓮整鼻，超雲即代妹澄清說：「唔係，佢由細到大都係咁，又唔係明星都冇必要整。」問她可抗拒打botox？她說：「唔敢試，我怕痛，如果真係要做，都會整呢度（指指腮骨位），等塊面瘦啲。」
經常陪賭王父親出入的超雲，直認沒拍拖，揀選男友她有四大要求，她說：「要自己鍾意、靚仔、身家要幾好，思想又要好。其實呢啲條件喺香港絕咗種。我唔介意同外國人拍拖，爹哋都OK，只要唔好係黑麻麻，唔好係阿差就得。」她謂現時有追求者，但沒有合心意的，她又再澄清霍啟文並非追求者。
楊恭如天熱停工
此外，同場的楊恭如去年9月與補習天王KenKan（簡俊傑）分手，日前又被本報拍到跟貌似鍾欣桐的律師舊愛Warren雨夜蹺手，她前晚否認說：「唔係，係朋友，我係單身，睇緣份啦，我要搵有上進心、勇氣嘅人。」
問到工作，楊恭如竟表示天氣太熱，要到秋天才接工作，相當離奇。
採訪：LawWaiMan
攝影：ChanShunChing
