轆Book：狂派博派　戰車對決

睇完《狂派再起》，網上評語兩極化，讚嘅係CG無停過睇得High，但有人嫌CG多得滯，睇到視覺麻痹，直指MichaelBay走火入魔。儘管今集狂博兩派人馬多到爆，但新角佔戲極少，汽車造型更係曇花一現。為咗滿足番睇戲時噓爆嘅車迷，今日就同你逐架車捉番出嚟，一次過睇到夠，不過先旨聲明，大量劇透㗎。

記者：徐影龍

面目猙獰大而無當

麥加登今集變咗架有履帶嘅戰車，狂派舊人物得佢一個玩晒，星星叫、音波等全部變晒大茄，路障直頭失埋蹤㖭。新角色好多，老麥師傅Fallen唔變形，當佢無到，反而巨大化嘅狂派新角更搶眼。唔計開場上海一戰十幾層樓高嘅巨轆怪，中場嗰隻由建築車6合1而成嘅Devastator最搶，泥頭車、鏟泥車、吊雞等本身已夠巨，合埋一嚿成隻機械哥斯拉咁爆，可惜同巨轆怪一樣得個睇字，施展完吸星大法即被Twins打爆。最令人光火大概係狂派居然識變身真人辣妹，有波有籮咁色誘主角！點吹都變唔到人類呀？

■人形出場一樣唔多，跟電單車追逐一陣，轉頭就被Sideswipe一分為二。

■結合成Devastator破壞者，超級巨型，絕招係吸星大法。

■6架建築系工程車，出場時間算多，反而結合後頂唔得耐。

■麥加登今集變成有履帶嘅戰車，第一次睇完全唔覺變過身。

■狂派系以黑鐵色為主，搞到老麥嘅人形狀態成堆廢鐵咁。

仍然偏愛雪佛蘭

博派起碼有5位常駐角色，都係參照雪佛蘭（Chevrolet）嚟變身，除咗車廠最力撐《變形金剛》外，荷李活片撐番美國品牌都好合理嘅。對比狂派，博派戰車出場位算多，雖然大多屬走馬看花，不過勝在創意搭夠，如第一架識變啡呤車嘅女性機械人、一分為二變成兩架CuteCar嘅Twins、以及極度浮誇嘅貨櫃車＋黑鳥戰機，令到柯柏文變成識飛嘅至尊金剛等，全都令人拍案叫絕。可惜新車又係過眼雲煙，一班舊角色如力捷、鐵皮等，命運更同狂派舊角一樣淪為大茄。