半年結效應未有為港股帶來升市，恒指試衝18900後即升勢乏力，未能上破19000關，及後更倒跌收場，下挫149點，收報18378，成交卻增至651億元，難怪唔少散戶都擰晒頭！大家見個市咁玩法，唔知7月港股會係乜環境，開始唔敢太樂觀。
不過，睇番09年上半年，港股首6個月已累升28%，以昨日收市18378計，已重返去年9月水平；其實頭半年股市在金融海嘯陰影未消之下有咁成績，已經係無幾多人估到，唔少散戶淨係睇經濟數據而造淡，尤其在大市升上16000後更肆意沽空及買熊證，結果俾人挾到氣咳！過去3個月股市嘅表現，散戶究竟上了怎樣一堂課，不妨趁今日假期檢討。
內地發改委上調成品油價格，石油股昨表現一度係威係勢，尤其係中石化（386）曾升破6元，最高見過6.06元。有券商報告認為，此輪調價可令中石化煉油業務每桶收入提高7美元，有助彌補油價上漲帶來的成本。中石化旗下幾隻「仔」表現各異，上海石化（338）及中石化冠德（934）分別逆市上升0.8%及2.2%，報2.67元及1.38元；表現最差係儀征化纖（1033），股價下跌2.4%，報1.61元。
儀征今年首季扭虧為盈，賺3634萬元人民幣，主要受惠於原油成本下降，加上聚酯產品需求及價格俱見回升，料次季及下半年經營情況續見改善，可吼回吐至1.50元吸納，目標2元，跌穿1.25元止蝕。
方星俠