今日七月一日，大記者一如以往，呼朋引類，齊齊參加大遊行，連七十幾歲嘅四姑姐都一齊去，當作體力勞動健身喎。睇嚟七一遊行已經逐漸基因變種，慢慢變成有香港特色嘅抗議嘉年華會，成為本港風土民俗，到咗有一年的七一，如果冇人遊行，香港恐怕已變成一個失去活力的老化城市。
香港人最緊要爭取自由，各自精彩，不想政府高壓，亦不想人與人之間各自擠壓，個體自由係左丁山最尊重嘅，個體主義（individualism）係個人人生原則，最怕人講集體主義，乜都要一齊行動。大記者問過左丁山去唔去遊行，答案係唔會，今日會去馬場，除咗自己隻團體馬出場，希望臨尾博一博之外，仲要捧馬主協會場，身為馬主，點都要捧吓今日舉行嘅第八場馬主協會錦標嘅啫，呢場馬嘅熱門之一會係四號「比翼雙飛」，質素高，馬主包大偉（DavidPhilipBoehm）有運，練馬師大摩為咗爭練馬師冠軍，與方嘉柏鬥到入直路，仍然落後兩場，今日唔會垂低手投降呀嗎？呢隻馬嘅馬主雖然係西人，但為馬取名，甚有文采，一隻「詩情畫意」（已退役），一隻「花好月圓」，一隻「鳥語花香」，再來一隻「比翼雙飛」，今季贏到開巷，唔到你唔服。
你去遊行，與起碼幾萬人甚至十幾萬人一齊，感覺興奮或帶有憤怒，有一股抑鬱氣要宣洩，要對某些你認為不平之事物表一個態，好得很；我去馬場，又有幾萬人在場喎，有人為贏錢笑得高興，有人為輸馬講晒粗口，破口大罵騎師，又係好得很，香港可貴之處就係人人有選擇自由，左丁山從來冇諗過移民，就係因為香港還有呢種自由，冇人要逼左丁山為這為那「表一個態」！即使講最流行時興嘅環保，外國已將環保變成宗教信仰，質疑者俾人打壓，但香港還有一個叫做「107動力」嘅團體，居然公開反對徵收膠袋稅，勇氣可嘉也。呢個團體嘅召集人叫做何民傑，係西貢區議員，佢話讀哲學時愛上了海耶克經濟觀點，反對集體主義，不人云亦云！何民傑指徵收膠袋稅反會增加膠袋使用率，破壞環境。為何如此，政府環保局可以問吓佢，而佢之膽敢冒環保團體之大不韙，站起來發聲，足證香港仍然夠free！