【王者傳奇之整容哀歌】美國流行樂天王米高積遜（MichaelJackson）猝死，連日成為轟動全球的新聞，有外國消息披露MJ生前濫藥因涉及整容後遺症，令他飽受壓力。其實近年多位本地藝人也備受整容傳聞困擾，如謝安琪（Kay）由矇豬眼變大眼潮媽，容祖兒則由扁鼻英皇小花變成尖鼻一姐，難怪昨日這兩位變臉樂壇天后出席活動時，提起MJ整容受壓不禁感同身受，異口同聲為他抱不平。
米高積遜猝死原因至今仍是謎團，不過外國消息指他歷年來竭力由黑人變白人，接受過多次皮膚漂染及整容手術，奈何人工搭建難敵歲月，其整容後遺症不停浮現，令走樣的他承受沉重無比的輿論壓力。事實上，不少中、外明星成名後總備受各類傳聞困擾，近年港星也掀起變臉潮，由從前最普遍的割眼雙皮、磨腮、拉面皮，發展到今日的打botox、開大眼、鼻翼變細、鼻樑變高、嘴唇變厚又變薄，甚至脫胎換骨大修葺乜都有，真真假假難分辨。
大鬧唔尊重死者
本地多位藝人曾傳整容，他們對於MJ整容受壓俱感同身受，新紮樂壇天后謝安琪正是人辦之一，從前細眼爆牙的她，如今卻擁一排整潔美齒及娃娃大眼，被指整容的Kay昨日現身電視城，提到米高死後被揭整容醜聞時，她越講越激：「呢10年嚟關於佢嘅醜聞，已經將佢以前嘅豐功偉績全部化為烏有，對已死嘅人唔尊重，而且仲好過份，使唔使遞埋個咪畀佢喺棺材度回應呀？佢仲有好多嘢可以關心，好似佢生前受債務影響，又可以關心吓佢下一代嘅照顧問題，唔一定係呢啲事囉。」問她是否感同身受，她則說：「唔關事，我只係作為一個樂迷，支持佢嘅fans覺得好氣憤，希望件事可以告一段落，可以畀佢安息。」
祖兒唔敢同MJ比
效力英皇10年的一姐容祖兒，近年其整容傳聞甚囂塵上，指她由昔日扁鼻妹變成尖鼻女王，遂被網民封為女MJ，網民又指她與車路士黑人球員艾辛（MichaelEssien）似樣，再為她封號「容艾辛」。昨日祖兒與師弟妹陳偉霆和泳兒到港台接受節目訪問，這英皇一門三傑無獨有偶均傳整鼻，祖兒對於被指與MJ樣貌酷似只笑說：「我點可以同MJ比，佢係神，神聖不可侵犯，都試過畀人寫話我似唔知邊個黑人足球明星（艾辛），佢又係厚唇，分開眼，都幾搞笑。我覺得冇所謂，我本身唔係靚，又唔係要保持完美狀態，有人鍾意聽我嘅歌咪得囉。」
祖兒指MJ整容是事實，但不會影響他的實力，外形怎樣整也好，他始終是一個有靈魂的舞台巨星，祖兒說：「其實我覺得佢唔整都幾cute幾靚仔，整咗之後就獨特啲囉。」祖兒更謂明白MJ承受的壓力，她說：「我當然唔係好似佢咁巨星，但都會明佢嘅感受，大家唔好只係睇佢嘅負面新聞，係要睇佢為樂壇付出幾多。我哋永遠失去咗一個巨星，不過我相信佢嘅作品會流芳百世。」
泳兒變相認整鼻
被傳修細大鼻翼的泳兒則對MJ整容回應道：「我覺得適當修飾係OK，令自己自信啲，呢個年代好普通，唔好整到面目全非就得，過晒火。」她又否認整鼻之說：「我冇整到，但如果人哋當我整咗又話我靚咗，我都可以接受。」
視MJ為偶像的陳偉霆和o靚模緋聞女友楊穎（Angelababy）齊傳整容，前者由圓面塌鼻變尖面高鼻，後者由厚唇變薄唇之餘，基本上五官輪廓變晒。陳偉霆昨對自己的整容傳聞解畫說：「我唔會理呢啲新聞，因為自己知唔係囉，唔會唔開心，反而見到偶像啲負面新聞唔開心，人都死咗，佢在世時咁辛苦，希望大家畀佢安息，尊重番佢。」
Angelababy日前被拍得口腔內有整容疤痕，陳偉霆聞後即大笑說：「嗰個疤痕一定係痱滋囉，佢好鍾意食零食，所以成日生痱滋。」問他是否和Baby咀嘴時知道對方有痱滋？他即大叫：「唔係，佢成日講嘢都唔清楚，問佢乜事，原來係生咗好多痱滋。」
鄧麗欣（Stephy）最近再傳雙眼整容，昨日她現身新城時說：「都唔係第一次講，第一次話我就唔開心，家覺得開心，因為覺得你靚咗先會講。」
採訪、攝影：胡比、王連連、何慧斯、彭琮然
資料庫：跌崩鼻釀整容悲劇
米高積遜臉上的整容手術傷疤，透視了他的悲劇人生。1979年的某天，事業如日方中的MJ在舞台上跌倒，撞崩了鼻子，展開了其整容生涯。手術失敗令他再次走進美容院，自此便沒完沒了，當初的扁平鼻已變得尖削，近年更出現下陷迹象。另一方面，身為黑人的MJ，多年來皮膚越變越白，也惹人揣測他曾進行漂膚技術，將皮膚漂白。
有相為證：藝人變臉前後圖鑑
娛圈整容成風，惟當事人例牌否認，故以下全歸納為疑似個案。
資料來源：《蘋果》資料室
割眼組
矇豬眼還可靠大眼仔「魚目混珠」，但雙目距離九丈遠就惟有「畀錢開眼」了。
隆鼻組
鼻扁欠神韻，隆鼻手術聲稱風險低、成效高兼快過打針，不少藝人躍躍欲試。
豐唇組
魔術師法力無邊，但整形師也不遑多讓，將孖膶腸變櫻桃又得，想櫻桃變孖膶腸亦得，得咗。
打針組
包包面成為女性大忌，有人願冒歪面風險，都要在粉臉上打botox，弄至臉部膠膠地。
換面組
正所謂一不做，二不休，來個fulltreatment捱多幾刀，又是一名索女。
