TVB套《ID精英》今個禮拜殺入結局篇，呢次係30幾年以嚟，電視台首次開拍以入境處為主題嘅連續劇，入境處高層重視，唔少ID精英晚晚收工後都有煲劇。八方聽聞內部反應幾正面，話劇中介紹入境處做嘢手法都幾寫實。
投入劇情模仿對白
套劇嚟緊星期日大結局，八方聽聞入境處長官會所到時會有party，職員可以一齊睇電視送飯，每人收費百幾蚊。唔少入境處阿Sir都投入劇情，據聞有啲職員更模仿劇中對白，見到上級時就大聲嗌MorningSir。
劇中姜大偉飾演調查組總入境事務主任麥啟銘，老戲骨演出頗受好評，入境處內部對號入座，猜測角色原型，有人指可能係已退休嘅助理處長麥桂炘，麥Sir處理過賴昌星案，梁錦光殉職時負責致悼辭，不過麥Sir較高級。姜大偉喺戲中主管調查科，負責拉黑工、緝假證，職務同總入境事務主任（調查）特遣隊主管王武昌似乎最近磅。
呢套劇仲有八卦嘢，就係有一集提到入境處人員行動時佩槍，現實中卻係冇佩槍嘅，不過八方聽聞入境處青山灣羈留所嘅人員，今年底可能會陀槍，會配備催淚槍作保安之用。