出戰今屆U21歐國盃嘅英格蘭幼獅，被領隊皮亞斯認為係史上最強一隊，點知就衰喺後備龍門史葛路治手上，搞到喺前晚決賽慘吞德國4蛋，德國就首次封王，兼成為首支歐洲小國腳賽事3冠得主。
史葛路治擔正騰騰震
英格蘭分組賽喺死亡B組突圍，仲要兩球輕取賽前捧盃大熱西班牙，4強同東道主瑞典鬥足120分鐘後破宿命射贏12碼入決賽，個勢強成咁，球迷都以為佢哋可以繼84年後再度封王。好衰唔衰，喺決賽有正選龍門赫特同兩位射手艾邦拉荷及費沙甘保停賽，咁就出事嘞。
臨危受命打龍嘅史葛路治踢到驚驚青青，完全要為英格蘭第2球（判斷錯誤被奧斯爾射入罰球）同第3個失球（被辛度華拿射穿大細龍）負責。至於打單箭頭嘅禾確特就做咗隱形人，毫無威脅。結果喺攻不銳守不穩嘅情況下，以0:4輸畀德國，強勢開始，爛尾收場。
德國大炒爆125倍波膽
雖則英格蘭幼獅捧唔到盃，但喺皮亞斯帶領下喺U21歐國盃表現得好好，上屆晉身4強，今屆就殺入決賽。查實皮亞斯賽前已續咗兩年約，留效至2011年夏天，希望佢哋喺下屆可以攞到冠軍啦！
至於贏英格蘭捧盃嘅德國就威喇，早前經已贏咗08年嘅U19同埋09年嘅U17歐國盃，家連U21都攞埋，成為歐洲小國腳足球歷史上，首支大滿貫球隊。之前佢哋被評攻弱守強（4場入4球失1球），家陣居然一次過送4隻蛋畀英格蘭，應該冇乜人估到呢個125倍嘅波膽。
話時話，德國大國腳班主力好似波歷克、芬寧斯同高路斯等都30幾，真係要搵人接班。如果佢哋入到明年南非世界盃決賽周，喺今屆U21歐國盃打得好好嘅紐亞、賀維迪斯同奧斯爾等，都好有機會成為路維（大國腳教練）麾下其中一員，並為德國足球揭開新一頁。