有得博就唔使四圍頻撲，係好多賭仔嘅口頭禪，錢搵錢無罪，諗辦法抗通脹也非常有理，只係豪賭玩命就無謂。自己知自己事，散仔既欠第一手資訊，又欠資金跟隻股票鍊到底，豪賭玩命，遲早好似玩角子老虎機，大部份人會將贏番嚟嘅銀仔擺番落去，玩到個兜空空如也才收手。
有次與金手指孫柏文一同出席財經講座，佢送咗一個好重要嘅市場情緒參考指標畀在座聽眾，以界定股市風險水平，就係本報每逢周一刊出嘅散戶調查報告，以持貨比率、樂觀指數及短期入市比率，作為反映散戶對股市的信心指標。最理想嘅指標當然係直接問大戶，因為佢哋個Pool夠大，足以扭轉乾坤。睇睇由投行變身商業銀行而得以生存嘅兩家大行，佢哋唔只係行內最大交易商，亦係難得少數可以有錢還畀政府嘅生還者，仲仍然係機構投資者最樂於採用嘅主要經紀（PrimeBrokers）。幫襯佢哋唔只因為佢哋夠大，更因為可以第一時間收到料，除資金出入情況，最關鍵係流向邊一個板塊。
大戶手影高度機密
有人會反駁，市況逆轉時大戶一樣可以重傷，當然，根據美國對冲基金研究公司HFR報告，單是2009年首季，全球倒閉之對冲基金就有376家，去年第四季則有778家，數字破晒紀錄，成為雷曼陪葬品。大部份對冲基金都幫襯嗰幾家大行，但係唔等於佢哋亦獲告知第一手資料，皆因佢哋嘅死亡，平時借埋錢畀佢哋搏殺嘅經紀，可能有如天葬儀式中的禿鷹，飛落嚟食晒個客成盤組合。認識一位著名美資大行之基金經理，當問到佢近期資金流向時，佢話基金經理其實唔係第一個知道啲錢點玩，身手敏捷嘅前線交易員（Traders）先至最清楚邊個大戶正在出出入入。呢啲係例牌高度機密，佢哋收到料都已經隔咗一重，我哋平時睇唔到大戶手影，惟有住班股市點心嘅情緒指數啦。
有5千年歷史嘅猶太人發現一個放諸四海皆準嘅二八定律，亦叫做巴萊多定律（Paredo），例如一個企業裏面通常由20%嘅人完成晒80%嘅工作。應用於投資成績，就係你在交易中出現之20%犯錯，有可能會令你損失80%資本。投資投機生涯好漫長，無人能夠保證自己唔會犯下呢20%的錯誤，為規避這20%錯誤所造成的重損失，最理想方法是把本金分成10份，每次只拿出本金的10%去交易。
胡孟青