言承旭02年爆出同台灣名模林志玲拍拖，但佢哋從冇承認，近年林志玲已轉投台灣商人邱士楷懷抱，有指二人仲有結婚打算㖭，不過言承旭每隔一排，就會失驚無神以林志玲做話題。言承旭噚日喺台灣錄影中天節目《沈春華LifeShow》時，佢忽然自爆過往一段刻骨銘心嘅愛情，佢話分手後曾搵人代寫情信畀女友，但最後又冇膽將情書寄出，結果只係將封信收收埋埋，言承旭解釋唔寄出原因：「如果自己沒有那麼好，寄出後，會不會讓她從此掉入不幸福的開始。」
言承旭話呢段情喺自己出道前開始，出道後就玩完，維持咗幾年。佢話分手係因自己未夠好，佢話：「我一直以來很孩子氣，沒自信，不成熟。」言談間言承旭又對舊愛讚不絕口，佢08年喺日本開騷時曾多謝林志玲，有傳女方當時都喺現場，言承旭聽完笑而不答，等於默認。雖然言承旭沒有開名女友係邊個，但憑佢提到女友曾入住台大醫院，咁啱林志玲05年拍廣告喺大連墮馬，都住過呢間醫院，認真巧合，睇嚟言承旭要喺節目向舊愛表心迹。
侯文詠代筆
至於嗰封情信，原來係言承旭幾年前搵好友、《白色巨塔》作者侯文詠代筆，侯文詠噚日都踢爆話：「他不擅言詞，我要他用寫信的，他說他不會寫信，於是我花了6、7個小時了解他為何對這段感情內疚，還努力用他的口脗來寫，信內容像在懺悔。」言承旭解釋當年未夠自信才不敢寄出，只好好保存嗰封情信，但主持沈春華指佢家較好，到底仲會唔會將封信寄出？佢猶豫咗好耐先答：「真的不知道。」
言承旭近日出碟，動作多多，莫非佢想追番林志玲？言承旭透過經理人Fenny話：「現在只想為每一位愛我、支持我的人努力，在工作上加油！」至於邱士楷聽到言承旭嘅訪問內容，佢話：「這為甚麼要問我呢？」