特區政府每年7.1都會分餅仔，公佈授勳名單，其中最受注目嘅梗係大紫荊得主，對上兩年嘅大紫荊得主特別多，竟然有四個，皆大歡喜。
諗過頒勳章畀華叔
至於泛民主派有冇人分到一、兩個勳章，同樣令外界關注，八方聽聞，泛民陣營中今年都有人上榜，結果唔會令人太意外，因為呢個人係向來同政府有偈傾嘅肥仔明李華明，如無意外佢會獲銀紫荊，表揚佢喺政圈嘅多年貢獻。
民主黨副主席單仲偕都攞過銀紫荊，上年改選時因此俾同樣競逐副主席嘅黨友鄭家富笑佢同政府關係好，所以白鴿黨人士攞到荷蘭水蓋未必係好事。坊間更傳言，特區政府曾經諗過頒個勳章畀華叔，但知佢老人家一定唔接受而不了了之。
有政界中人話，唔少政界元老級人馬退下火線，自然會係大紫荊熱門人選，有人即時諗起馬丁，話佢做過基本法起草委員，又歷任咁多屆議會，夠晒資格喇啩。可惜馬丁一向係中央眼中釘，除非馬丁忽然「河蟹」，否則呢世都同水蓋無緣。