噚日人民銀行行長周小川同金管局總裁任志剛喺巴塞爾開完會，一到香港就第一時間喺機場簽署人民幣貿易結算補充合作備忘錄。香港作為境外人民幣結算中心，又行前一步。唔少金融界好事之徒同八方講，今次周小川明益老友，等任總可以公佈好消息，作為佢臨別秋波嘅告別作。但佢哋點都估唔到，一直當正香港搞人民幣業務係最大政績嘅煲呔，連任總嘅尾彩都偷鬼埋咁冇陰功。
備忘錄唔係由煲呔簽
話說煲呔噚日出席醫療服務論壇，聽吓醫療界對發展醫療產業嘅意見，點知佢會後見記者，明明講梗醫療產業發展，突然話題一轉，無厘頭爆響口話要宣佈一個突破，就係佢好高興知道人行稍後會同金管局簽人民幣貿易結算補充合作備忘錄，然後又講咗幾句香港要長遠發展成人民幣結算中心之類嘅例牌說話。實情當時備忘錄仲未簽，亦唔係由煲呔去簽，有乜理由要佢越俎代庖，代周小川、任總事先向港人「報喜」？
不過，有了解金融界嘅下亞厘畢道好事之徒同八方講，八方此言差矣！事關自煲呔上場，佢交畀阿爺份「水蛇春咁長」嘅挺港政策清單之中，要阿爺畀香港搞人民幣業務，絕對係佢老哥張清單嘅前列「大禮」，結果喺距離7.1仲有兩日之際，終於等到呢份大禮到手，又點會唔情不自禁，「失禁」公佈呢個好消息？所以，唔可以怪煲呔抽水，特別係下亞厘畢道早有傳聞，任總之所以要擇正吉日國慶執包袱，就係因為畀某人覺得佢想喺呢件事上面爭功勞。
不過，話又得說回來，唔係個個人都買煲呔怕，好似噚日八方喺酒會撞到行會召集人梁振英，振英哥同煲呔一樣嚟自警察世家，早排煲呔為咗說服班陀鐵師兄、師姐唔好上街，於是搬出曾氏家族與香港警隊嘅關係，希望陀鐵師兄、師姐睇在自己友份上，畀個薄面唔好上街。咁振英哥又係警察世家，唔知佢點睇呢次差人嘅訴求？點知振英哥話，行會就快再傾呢樣嘢，唔係好適宜用警察世家身份講。振英哥果然嚴守行會紀律，唔知煲呔又點睇？
mailto:[email protected]