現年31歲的胡諾言，今年4月迎娶了34歲的陳琪，當時二人奉子成婚，但為怕BB小器，三緘其口。胡仔痛錫老婆，下令她停工在家安胎，胡仔除努力賺奶粉錢，還買了大量燕窩給陳琪進補，兩夫婦開開心心迎9月出世的牛BB。
胡諾言和陳琪今年4月才結婚，但近日夫妻檔替一間影樓拍廣告，相中的陳琪的肚如籮般大，他們更正式公佈有BB的喜訊。胡仔表示太太陳琪已有約6個月身孕，BB預產期在9月，換句話說二人早前是奉子成婚。
陳琪專心安胎
陳琪婚後即停工，專心安胎，胡仔則肩負賺奶粉錢重任，他昨日在電話說：「我哋兩公婆都好鍾意小朋友，太太有咗之後，我想佢多啲休息養胎，搵奶粉錢就由我嚟。」
由於豬流感肆虐，胡仔尤其擔心陳琪和腹中BB的健康，他說：「我對佢哋有一套保護措施，屋企會特別注重家居清潔，太太冇乜嘢就盡量少出街，我哋兩個嘅媽咪都成日煲好多湯水畀佢飲，食燕窩亦唔少得，我都買定咗少少存貨。」
搵曹永廉教路
胡仔表示喜訊公開後，不少嬰兒用品商都主動聯絡要贊助二人BB用品，胡仔說：「我都會細心挑選，產品一定要啱BB用，老人家話傳統要BB着吓人哋嘅舊衫，已經有朋友送咗啲畀我，遲啲我又會問吓做咗爹哋嘅曹永廉同媽咪姚嘉妮，等佢哋畀啲貼士我哋。」
由於首次做父母，胡仔表示BB性別要保密，他說：「其實仔女都冇所謂。」有指胡仔和陳琪有意生3個，他說：「咁長遠，唔敢講住，家最希望BB出世健健康康。」這次一家三口為影樓拍廣告，酬勞可觀，胡仔說：「呢筆錢會存入BB嘅戶口，留番畀佢做教育基金。」
採訪：比華利