冰河趣致獸　殺入侏羅紀

討人歡喜嘅《冰河世紀3大威龍駕到》，等咗幾年聽日終於上畫喇，但如今H1N1肆虐家長未必放心帶囝囝囡囡入戲院睇；唔使驚！同大部份荷李活電影一樣，《冰河世紀3》隻Game都會喺呢段時間推出，比起玩法略嫌單調嘅上集，今次佢作出幾大變化，用齊角色之餘仲可多人對戰，啱晒成家人一齊癲番晚。

文：陳福榮

冰原走進世外桃源

《冰河世紀3》遊戲版本依照電影嘅橋段嚟做，都係講樹獺森仔又搞出個大頭佛，因貪玩偷走恐龍蛋繼而成為一眾恐龍嘅通緝犯，點知無厘頭掉進前所未見嘅蓬萊「魔」境，正宗死多二錢重。
為求老友逃出生天，森仔班死黨包括長毛象文輝、劍齒虎大阿哥同松鼠小叻惟有鋌而走險，不惜赴湯蹈火都要救番佢條命仔，於是喺特性與構造截然不同嘅全部15版面進行冒險，唔再獨沽一味只玩冰原地帶，單係視覺觀感上已有大躍進。

■夾雜冰原同雨林間，森仔要搏命逃離大威龍追捕。

■神技！踩雪球喺窄窄冰橋上行動。

■唔知大阿哥能否跳過呢條咁闊嘅河呢？

角色一變六花臣零舍多

上集最為人詬病之處，係僅能使用松鼠仔嚟玩，正如玩格鬥都唔會只有Ryu同Ken俾你用啩？遊戲從善如流，除有齊主軸角色外，仲新增鼬鼠單眼亞北，佢基本上有齊所有動物優點——冷靜、醒目、打得兼勇敢，好多時都要由佢去揹飛。基本上全部6隻角色各有特點，有啲擅長係咁走，有啲則可同野獸單打獨鬥，甚至操控駱駝龍及翼龍等，所以每關都會由指定一位進行。而且佢哋各有行動特色，隨住過關後逐漸追加新招，一日未爆機都未可替所有技能解鎖。