【第37屆港姐之一聲嘆息】應屆10位準港姐容貌平庸，質素偏低，昨日大會上演重頭戲圖挽頹勢，安排一眾佳麗首度穿上三點式泳衣在北海道大湯沼拍攝外景，可惜仍舊無甚看頭，實在神仙難救。原先上圍驕人、貌似徐淑敏的3號鄭寶源突然縮胸，被質疑之前有裝假狗之嫌；其他佳麗不是股側有橙皮紋，就是腳粗、肩橫、有肚腩或臀部鬆弛。池中無魚蝦稱王，貌似周秀娜的5號馬詠恩結果以整體夠平均跑出。
應屆10位候選港姐昨日先後到北海道二世古的大湯沼及高橋牧場拍外景，分別穿上三點式泳衣及牛奶妹裝束示人。港姐泳衣向來是重頭戲，佳麗身材露真身隨時扭轉局勢，可是今回10位佳麗繼容貌質素跌爛港姐招牌後，昨日的泳裝look也繼續欠瞄頭。
3號鄭寶源胸部縮水
昨日所見，本來上圍豐滿的3號鄭寶源，忽然胸部升高但cup數縮水，寬橫肩一如欖球手，股側出現橙皮紋，與是非港姐1號曾曦寧同樣臀部鬆弛。而之前身形平平無奇的7號鍾溥敏和9號袁嘉敏原來胸部豐滿。美人生鬚的8號熊穎詩腰粗、臀側兩邊有橙皮紋、凸肚腩兼肚有摺紋；10號李姿敏也是粗腰及有腩一族。相比之下5號馬詠恩、4號劉倩婷和6號黃嘉麗的身形俱算平均，22歲的5號馬詠恩身形最fit，對此她說：「向來都係咁，OK啦。」
由吳君如提名的「娘版黎淑賢」9號袁嘉敏（Candy），曾是君如半個助手及陳可辛（Peter）的秘書，昨日大騷其34D上圍，她自信地說：「我對自己身形有信心，呢排食嘢都好清淡，以前我肥過，有成130幾磅，家冇磅瘦咗幾多。」
24歲的袁嘉敏又自爆曾被吳君如起花名「大波Candy」，她說：「以前吳君如喺電台開咪，話Peter有個秘書叫大波Candy，佢講完之後我都冇聽佢個節目，呢個花名佢改咗成年，都慣啦，之前就有少少唔開心。」若現在被人稱呼這不文花名又如何？她說：「唔好叫得咁鹹濕都OK嘅。」問她會否擔心減肥令胸部縮水？她說：「冇理到，我噚日仲食咗三杯雪糕。」
另一胸前偉大的佳麗，是曾在無綫新聞部擔任突發採訪記者、現年24歲的7號鍾溥敏，她說：「係衫嘅問題啫，唔希望大家將焦點放喺心口度。」
8號熊穎詩腰粗凸腩
21歲的3號鄭寶源曾自詡好身材來自遺傳，昨日其胸部忽然由大變細，她卻說：「我不嬲都係咁樣。」有指她有裝假狗之嫌，她自辯說：「我一直都係咁，冇所謂。」提到其臀部有橙皮紋，她說：「呢啲天生，做運動嘅人都係咁。」
25歲的8號熊穎詩又橙皮紋又有腩肉又腰粗，她一概回答「正常」，並說：「好多女仔都係咁，我一路有做瑜伽keep住。我對自己有信心，冇唔正常。」21歲的10號李姿敏自知身形橫，提到她好肉地，她說：「我會注意㗎啦，會做運動收身。」
此外，擔任港姐外景嘉賓的胡杏兒和陳倩揚昨與一班師妹到牧場揸牛奶，今日二人更會穿泳衣與一眾佳麗拍外景，希望能借此提升港姐的見報率。
採訪、攝影：王崇穎
話你知：《非誠勿擾》帶旺北海道
應屆港姐昨日到訪美景如畫的北海道，穿三點式現身如仙境般的二世古大湯沼（Oyunuma）。大湯沼原是日和山的火山口，現成為各大旅館的溫泉水源，由於周邊河川不停冒煙，故煙霧瀰漫，且傳出陣陣硫磺味。至於港姐揸牛奶的高橋牧場，設有Milk工房，製作的牛奶以新鮮香滑馳名。
以往內地人多選擇冬天到北海道觀光，但隨着馮小剛電影《非誠勿擾》（圖）在內地大收，加上電影將北海道拍得像世外桃源一樣，帶挈北海道連夏天也多賺了不少人民幣。
各位讀者如果認識十位入圍港姐，知道她們的底細，歡迎電郵mailto:[email protected]報料。
