警察員方協會前日請葉劉出席溝通大會，一啲都唔出奇，因為葉劉話晒係保安局前局長，同警察關係向來唔錯，但向來冇乜為警員發聲嘅鼠王芬都獲邀上台發言，反而係立法會對口單位嘅公務員panel主席李卓人就冇現身。
噚日開公務員panel，非委員阿涂專程現身問阿人，究竟警察職方有冇請佢去開會？阿人話冇，阿涂即時代出頭，話職方應請埋阿人，至少佢領導嘅委員會喺憲制上有重要角色。有人覺得阿涂冇份獲邀所以呷醋，但阿涂強調絕無此意。督察會嘅廖潔明解釋，請梁美芬係因為佢係該會學術顧問；員佐級主席鍾錦華就話，有傳過電郵畀李卓人，但冇收到回覆。