戒毒院舍正生書院搬遷風波喚起各界關注，就連《巾幗梟雄》中愛抱不平的四奶奶鄧萃雯，日前亦專程到正生書院為學生們打氣。雯女以多年拍戲吃過的苦頭來跟學生現時簡陋的學習環境作比喻，教他們如何克服困難，甚至計劃當義工教學生們演戲及與人溝通技巧，實行撐完柴九再撐正生學生。
這天室外氣溫30多度，鄧萃雯長途跋涉走到大嶼山芝麻灣的正生書院探望一班學生。甫踏進鐵皮搭建的簡陋校舍，雯女已聞得一陣陣的汗味，但這些氣味不但未有令雯女卻步，反而拉近了她跟學生們的距離。雯女說：「我同班男學生影大合照時，佢哋個個都唔敢企埋我身邊，我好奇問點解，佢哋就話：『我哋成身汗，驚影響到你。』我覺得好感動，估唔到佢哋咁有禮貌，我話：『唔緊要，埋嚟埋嚟！』。」
分享心得
正生之行，雯女參觀過校舍、學生上課情況，也有先後跟校長陳兆焯及學生們溝通，眼見正生擠逼簡陋環境，令雯女好不心噏：「嗰度僅比山區學校好少少，一張書枱幾個人共用，overload得好緊要，大熱天時困喺間鐵皮屋度上堂真係好辛苦，所以我同佢哋講，大熱天時拍戲點樣辛苦，講畀佢哋知自己點樣克服困難，例如不停安慰自己話家好凉爽，心裏面咁諗，心情都會好少少。」
充當導師
雯女不諱言，戒毒不難，戒毒後如何克服人家目光重過新生，以及抗拒誘惑才是一大難題。雯女說：「正生雖然係間戒毒學校，但其實佢哋係透過唔同教學方式去教班學生好多做人道理，我曾經問班學生第時再遇番啲壞朋友點算？佢哋就話：『我會話畀佢哋知我已經改變，唔再係以前咁。』我覺得好感動。」
雯女獲悉學生們對演戲、唱歌、跳舞也有興趣，正計劃做義工充當他們導師，雯女說：「遲啲我會同藝人之家同校長傾傾，教佢哋做戲同表達、溝通技巧，總之我係全力撐班學生。」
採訪：戴彩煥