基斯坦奴朗拿度（C朗）同泰維斯相繼離隊，坊間即時出咗條IQ題，問曼聯家究竟邊個先係新嘅揸fit人。朗尼就懶醒咁出嚟搶答，話佢可以做紅魔「新皇帝」喎！朗尼仔，你話係就係呀？家陣費Sir手上有8,000萬鎊（約10億港元）買人，邊位巨星會加盟都未知，你咪咁快攞架嚟丟先得㗎！
朗尼係就係好波，但我求大俠覺得佢自04年加盟曼聯以嚟，一直都只係配角，大主角永遠輪唔到佢做。「大帝」簡東拿嘅地位當然冇人能及，之後嘅碧咸、雲尼斯達萊同C朗都做過紅魔主角，偏偏朗尼做唔到球隊嘅揸fit人。
「入波重責交畀我！」
當今夏C朗轉投皇馬，外間就有個疑問，究竟邊個會做新大佬。朗尼就話：「C朗同泰維斯上季入咗好多波，家陣兩個走晒，我就會成為曼聯嘅『新皇帝』，入波嘅重責就交晒畀我啦！」
費Sir上季成功改造朗尼打左前鋒，效果見仁見智，而呢位23歲嘅英格蘭射手就話，自己最佳位置係正前鋒：「我出任左前鋒簡直係嘥料，我做唔到我想做嘅嘢；如果我踢正箭頭出任自己最佳位置，怕咩入唔到波？」
正前鋒仲有貝碧托夫
我求大俠唔係想潑朗尼冷水，但你講到自己係紅魔「新皇帝」，有邊個服先？一嚟費Sir收購行動未完，二嚟朗尼踢法一向唔係正箭頭類型，似輔鋒多啲，要佢一季入超過30球，難度好大啫。如果要揀紅魔陣中最似正箭頭嘅，仲有貝碧托夫囉。
話時話，大家睇吓朗尼點解喺國家隊同曼聯會着10號而唔係9號，就證明佢踢法唔似朗拿度、伊度奧同費蘭度托利斯等天生9號仔。我求大俠信朗尼會入好多波，但要做紅魔新揸fit人喎，應該仲有一段日子嘅。