資源股係今年市場熱炒主題之一，主因係新興國家崛起，礦產資源需求持續強勁，另外美元貶值，市場資金要搵項目保值，有人炒股，亦有人買「磚頭」物業，由於石油、貴金屬等商品係有限資源，始終有耗完一日，所以價格跌到支持位，就會有買盤趁低吸納，好快就回升。
好似鎳呢種金屬，睇番資料去年底每噸8.35萬美元，到今年4月升番上12萬美元，到本月初攀近15萬美元，升勢都算幾快。
候低吸納持中線
同期隻中國鎳資源（2889）股價亦有反應，4月中旬升上1.50元，一路殺上1.86元才跟隨大市回落。上周五收1.39元，升2.2%，料後市有調整，待跌至1元至1.20元之間吸納，作中線持有，目標2.10元。
集團金屬鎳廠房設計產能為6萬噸，會分期建設，首階段年產能1.6萬噸，預期明年中投產。由於集團經營環境正改善，估計毛利率可逐漸提升，有助公司盈利能力。
方星俠