最近見到編劇L，佢話搬屋時將啲數以千計藏書全部丟棄，感覺良好。班老友聽見，嚇咗一跳。編劇L以藏書多而出名，精裝《二十四史》全部有齊，文學小說劇本更收藏不少，全部係財產噃，點解捨得丟晒？
編劇L話：「我諗通晒，香港最寶貴嘅財產就係幾千蚊一呎的住宅，以咁貴嘅地產嚟藏書，我層樓可能係最貴嘅圖書館，自問身家冇十億八億以上，冇資格住在山頂大宅另闢書房，倒不如解放思想，丟晒啲書，無書一身輕，喺屋企騰出空間，等自己在蝸居冇擠逼感，鬆番一口氣。」
佢講得未嘗冇道理，但藏書多年，邊度下得決心棄書呀。編劇L話：「你識唔識得世界上有Google呢樣嘢呀？我丟書之前，做過好多次試驗，在Google搜尋，所有《二十四史》材料都可以搵到、下載，所有作者生平背景資料有齊，我用光碟已經下載咗五萬部書，我部手機載有幾本要睇嘅書，幾輕便呀，藏書已經係過時遊戲，唔係二十一世紀行為嘞，你哋死心啦。」
畀出版靚女P聽到嘅話，一定好傷心，人人學編劇L嘅話，邊個去買書呀？肥老黎在FCC演講，就提到必須發展網站，因為將來冇乜人睇報紙喎。諗諗吓，夏天放假時，好多人鍾意享受陽光與海灘，睡在沙灘椅睇驚險奇情間諜謀殺小說，將來可能變成拎住部iPhone睇，袋裝書冇晒市場，印刷商咪少咗好多生意？自己部iPhone已經下載咗唐詩三百首、宋詞及網上Dictionary，真係越諗越驚，書店咪要關門，電腦科技可以摧毀好多傳統行業㗎。
有Google啫，都要有人負責提供內容㗎。點解有人肯做，左丁山唔係幾明，譬如公關大姐大玩iPhone上網，貪得意將自己個名打入去，按「搜尋」，居然跳出一連串有關佢嘅背景資料，一啲係報紙舊聞，一啲係明顯有人組織舊材料，寫成簡介嘅。大姐大問：「邊度有人咁有時間，免費編寫我嘅資料嘅呢？」大家唔識答。將唐詩宋詞上晒互聯網，免費畀人搜尋嘅，又係乜嘢人呢？若果唔係有咁多可敬的網上義工，編劇L丟書唔會丟得咁爽快。