千億新抱徐子淇嫁入李家後唔需要再拋頭露面，行天橋做代言人通通唔使預佢，總之叠埋心水努力造人，結果如願以償三年抱兩，生完仲係明艷照人，唔會好似其他開刀媽咪咁面青唇白手腳冰冷，除咗因為有名貴藥材補身之外，唔知係咪同佢入住老爺旗下嘅仁安醫院有關。
二女出世玩低調
仁安以超豪酒店式套房聞名，既有山景又有SPA浴池，子淇順理成章兩度喺仁安生BB。早排《蘋果》娛樂版報道過，仁安最近出咗本叫《靚靚媽咪全攻略》嘅書，仲搵埋子淇寫序，話睇住大女晞彤（Leanna）慢慢長大，真係好幸福，又話做媽咪都可以又靚又fit，真係恨死唔少OL。
對於呢本書仁安都好重視，不但喺六月份會員通訊度強力推介，仲由原價108減到特價88元（仁安優惠價75蚊㖭咋），等多啲準媽咪分享到千億新抱嘅心得。子淇07年誕下長女晞彤，老爺心情大好，連續兩日喺四季酒店搞「發實宴」，每張喜帖豪用180粒Swarovski水晶砌成羽毛圖案，成本300大洋一張，估計兩晚花費超過450萬，成為一時佳話，不過二女出世暫時仲係玩低調，未知會唔會同姐姐一樣有發實宴。