大姨媽我後生過，今時今日亦絕對跟得貼潮流，之不過唔係麻木嗰隻囉，好似話又粗又In又話夠Raw嘅軚環就認真咪預我，我真係唔識欣賞。好似噚日有個世姪約我去High-tea，仲好有誠意嚟接我，原來想俾我欣賞吓佢部全新改裝勁跑，又如何？世姪鍾意咪得囉。「Auntie，你試吓，部車好勁好有Power嘅！」一坐上去好自然握住個軚盤，全真皮質料軚環握上去幾舒服亦唔會滑手，唔錯，而且軚感偏硬，係好適合高性能車用……咦，唔多妥，好似粗咗啲喎。自問我手掌亦唔算細，屬一般，但係個軚環就有些少握唔晒嘅感覺，世姪喺男人中屬瘦弱型，手掌都唔慌會大，揀個咁粗嘅軚環真係少咗危機意識。就算潮流幾興、個款幾型、個人幾鍾意都好，都要睇吓啱唔啱自己，揸上手太粗或太細都唔好，遇有突發狀況，隨時揸唔穩軚環就咩情況都有可能發生，太危險。即時命令世姪換軚環，NoExcuse！
文：大姨媽