警察唔上街，開大會，唔少人認為新聞性大跌watt。但八方唔係咁睇，今次個會其實好有歷史性，會後主辦者之一嘅員佐級協會主席鍾錦華話，個會有2,300人參加；八方再問PPRB，居然又係話2,300人。今次絕對可能係香港開埠以嚟，警方破天荒首度同集會主辦單位公佈嘅集會人數完全一致，可謂空前，亦可能係絕後。
集會遊行例牌亂篤數
每次遊行集會之後，警方公佈嘅參加人數一定少過主辦單位公佈嘅好多，今年六四維園集會就係近年最離譜嘅例子之一。噚日警隊員方四會召開薪酬問題溝通大會，請到一哥同一眾高層出席，場面好盛大，淨係個大禮堂都坐滿人，仲未計唔少人入唔到去。鍾sir會後話，有2,300個夥計到場開會，但警司協會主席岑維健同八方講，計計埋埋應該有成3,800人。咁講法，咪即係今次警方又慣性低估集會人數？
保安局局長李少光早前喺立法會度話，每次大型集會、遊行警方都會喺啲觀察點度數人頭，唔係亂篤數，但今次員方兩個會嘅講法都差咁遠，可見警方數人技巧方面真係要再培訓。不過，今次警方都真係做到足，平日逢遊行都會出動嘅警察攝製隊噚日都有嚟拍片，但據佢哋講，拍嚟係畀入唔到禮堂、要喺其他房睇直播嘅同事收看。
噚日出席嘅大部份係男子漢，但台上都有兩位女士，就係葉劉同老鼠芬。兩個都不約而同着黃色，唔知係咪襯番啲「皇氣」。但老鼠芬發言時就唔怕肉麻咁執煲呔口水尾，話自己兩個阿叔係警察，個堂細佬又係CID，所以佢好明白警察嘅犧牲，知道警察嘅屋企人一收到差館嘅電話就好驚，所以佢好支持警隊有獨立薪酬架構，仲話佢城大唔少最乖最勤力嘅學生都考警察，真係落足鞋油。
誰不知同場嘅紀常會主席張震遠開口就話：「我阿爸同兄弟都唔係警察，我冇親人係警察，但唔使親人係警察，都知警察嘅獨特性同挑戰。」明落老鼠芬面之餘，仲暗寸埋煲呔㖭，高招！
mailto:[email protected]