被監管機構視為「股壇壞孩子」嘅Tony馮永祥，本來已經低調，舊年淡出禹銘投資（666）後更加少現身。佢上星期畀面世叔伯恒基地產（012）主席四叔李兆基，飛去北京見證四叔捐4億銀畀北京大學同清華大學，仲出席以李兆基命名嘅學苑同大樓奠基儀式。
久未公開露面嘅Tony今年58歲，睇落心廣體胖咗，面色紅潤，一派養尊處優咁款。佢同華華講，自己雖然淡出上市公司，但唔係退休，家係私人嘅「禹銘物業管理公司」主席，主力搞中港地產，唔會掂股票咁話。
佢仲透露，呢一兩日可能會開記者會宣佈一項投資，至於係乜就三緘其口。
禹銘07年將一批香港零售物業賣畀Tony同佢拍檔Peter馮耀輝後，兩人齊齊淡出，仲繼續合作無間，聽講新投資就係同Peter一齊搞。
新搞作日內揭盅
近年Tony通常留喺香港，仲會返寫字樓返工。禹銘投資亦啱啱通過改名為新工投資（SHKHongKongIndustries），實行同禹銘個名分番開，但大家依然會有合作。
馮永祥係馮景禧之子，同四叔淵源甚深。馮景禧、四叔同郭得勝「新鴻基三劍俠」，喺50、60年代一齊成立新鴻基企業，即新鴻基地產（016）前身，之後3人分道揚鑣，四叔創立恒地，郭得勝繼續經營新地；馮景禧成立新鴻基證券，投身證券界，至96年易手。
李華華
mailto:[email protected]