【本報訊】平反六四之路，抗戰20年；爭取普選的征途，我們更不經不覺踏上了23年。民主黨主席何俊仁86年已加入爭取88直選，革命仍未成功，但他認為，若不是港人長年累月的堅持，今天的立法會絕不會有30席直選、香港也不會有言論自由，「一早變咗澳門」。
58歲的何俊仁說：「對於我嚟講，爭取民主係一個持續嘅奮鬥。」八十年代，何俊仁是最早一批站出來支持回歸、港人民主治港的香港人，「家啲大紅大紫愛國人士，嗰時仲搞緊移民，驚咗共產黨。」86年民間首次召開「高山大會」爭取88直選，結果未能如願，但何俊仁認為，爭取的過程已很有意義，表現出香港人有意識、有訴求。
告訴北京民主不可怕
「爭取唔好只睇係咪攞到100分。如果個個好似民建聯、工聯會咁，只要飯票不要選票；好似自由黨咁掛住做生意，舞照跳唔好講政治，香港會點？一早冇咗燭光集會，法輪功拉晒，23條立咗啦，批評政府好似劉曉波咁俾人告啦！」
年底踏入新一輪政改諮詢，何俊仁表示，北京「大石壓死蟹」，早已表明2017才有普選，不許2012增加直選比例，逼港人收貨；港府又圖快刀斬亂麻，只用三個月諮詢就想匆匆拍板；加上共產黨慣用群眾攻勢，現正地氈式拉攏街坊會、體育會屆時出來表態。「咁嘅形勢下，我哋更加要講畀北京聽，香港人係唔服氣，咁好難有社會和諧！」
年底的政改諮詢將決定2012的選舉方法，何俊仁呼籲港人把握今年7.1的機會，向北京表達民意，告訴北京民主並不可怕。「我哋唔係一時怨憤，03年以嚟已行出來咁多次，我哋只係要求一個好制度，令呢一代，下一代，世世代代長治久安。」