公民黨副主席黎廣德噚日舉行新書《釋放香港》發佈會，多個黨友撐場，陳淑莊更同男朋友「英雄」叢鐵飛拍拖到場。
英雄平時罕有曝光，噚日忽然蒲頭事出有因。有人同八方講，日前陳淑莊為社民連季詩傑落區拉票後，圈中惟恐天下不亂者，即傳出四眼陳同阿季鬧緋聞，雖然兩人撻着機會率接近零，不過唔少毒男、電車男仍然在網上不斷起哄，正是謠言止於智者，流言要趕佢扯，因此不排除有人有意無意行孖咇，企出嚟宣示主權。
英雄噚日好低調，同陳淑莊逗留約半小時就一齊鬆人。八方見陳淑莊拎住《禮儀師之奏鳴曲》同《讀愛》兩隻DVD，相信兩人趕返歸煲碟。陳淑莊話入戲院睇禮儀師喊到失聲，淚眼汪汪根本睇唔清楚套戲，所以要睇多次。