冠軍科技（092）現價企喺9年低位，點秤點度，真係好殘，係咁意博翻半番，一啲唔過份。冠軍現價0.275元，仲低過沙士價70%，月線圖14RSI得33，純股價表現，殘。又冠軍呢期啱啱完成1供1，連供股攤薄效應，最新NAV1.70元，股價大大折讓84%。即使齋計有形資產值，NAV都講緊1.18元，折讓仍達77%。
冠軍09年半年度（12月底止），因為多咗筆預付開發成本減值9430萬銀，純利倒退咗70%，到1.07億銀。非常保守計數，就當冠軍09年全年度純利，只係keep到半年度水位，再用供股後嘅已發行股數40億股計，09年度全面攤薄預期PE，都係得10倍咁大把。再講，冠軍主打祖國市場，收入當中有超過7成貢獻嚟自祖國。ChinaPlay兼科技類股份中，呢個PE實情唔係貴。呢轉博冠軍翻半番到0.41元，到時NAV折讓，仲係高達65%。
北青現價博升7成
北青傳媒（1000）到上年底止，揸現金12.86億銀人仔，借貸1億銀，淨現金高達11.8億銀，相當於北青每股6.80港元，北青現價講緊得3.93元，每股淨現金值，係遠遠超過現價。同上邊冠軍一樣，北青價殘，兼誇張得很。又北青終極對口單位係北京市政府，股東實力咁厚，北青又係上市旗艦，由業務到市值，應該有唔錯嘅壯大空間。冷吼北青，買完擺埋一邊，博北青上番現金淨值，潛在升幅70%。北青P/B仲係企喺1倍樓下，同類股當中，仲係抵買。
錢雋