筆者之前一直話大市升得高，隨時出現震倉下跌，所以逢高套利，先打游擊戰，吼低位再撈，但上周大市上衝下洗，有如過山車，投資者情緒亦有180度轉變，由19000水平極為看好，變成恐慌下跌至17300水平，人人想着沽貨，更紛紛預測調整幅度。經驗告訴筆者，集體活動不適用於股市，所以士佳反而當時覺得入市，值博率甚高，於是在網上通知學員，亦在友報寫話以強勢股做基礎，搶先入市撈底，結果市場畀面士佳，大市由17300水平掉頭向上，是次偷襲行動甚為成功。
大市連彈幾日，已升過千點，本來撈底成功，已經係套利好時機，但上周五市況乘美股前一晚升市再度上揚，連早前反彈高位18418水平阻力亦已突破，短期大市走勢講唔埋，但中長期大勢已然好轉，牛市策略，在於吼低位長揸。
震倉係你老友記
震倉其實係投資者的良朋知己，震倉有大有小，難以預計大市調整幅度，但觀乎近日大市跌得少、彈得多，市場購買力實在不容小覷，就算再跌，跌幅可能亦有限，投資者已可考慮入市作長線投資。
有讀者見大市彈得太快，問筆者會否再有低位可買？士佳並非估神，真係唔識估，因為就算長線投資可以入市，亦不代表短線低位一定不會回試。其實以前牛市伊始，亦曾經出現震倉回調，例如1999-2000年科網股泡沫，大市變牛之後亦曾經回調，下試牛熊分界線；2003年大牛市亦一樣，大升之前又有震倉，但以其後續力量計算，買高幾百點，只係微不足道。股市不斷循環，太陽底下無新事，相信今次亦會類同，只是牛市的一個中途站而已，關鍵在於確認大趨勢，而非撈正最低位，所以就算再調整，筆者也無怨無悔。
既然如此，投資者與其預測大市會否跌多幾百點，不如想想確認牛市，應該入幾成貨，買咩股，筆者自己已入五至六成，其他吼低或破頂才加碼。過去幾日雖然大市曾經急挫，但不少個股一直穩守早前支持位，例如一眾能「源」，資「源」及新能「源」股隻，不是跌唔落，就係率先逆市創新高。好像上周五大市雖升，但與19100頂部水平仍有距離，其中一隻「源」字輩股份，福山能源（639）已經破了近期頂，如此優於大市之選，投資者可以考慮，還有咩股好買？有很多，不能盡錄，總之一字記之曰：「源」字是也。
張士佳