除IMAX，近期家庭影院都玩上3D，如早前《地心探險記》，就要戴上左紅右藍嘅立體眼鏡，先嗅得出戲味！今回冇得尋寶歷險，改為體驗恐怖驚慄嘅情節，變態殺人王手持鋒利鋤頭，戴起立體眼鏡欣賞，感覺如劈埋身一樣，加埋血肉飛濺等核突畫面，如果你夠膽，一定要等夜晚熄晒燈先好睇！
記者：陳國輝
30分鐘見頭暈
盒內附送4副3D眼鏡，你可能會諗：「嘩！咁咪啱啱好一家四口齊齊睇？」如果屋企有小朋友，咪睇！如果你係孕婦，都咪睇！呢個唔係政府呼籲，只不過小記想特別提醒大家，戴住3D眼鏡唔同一般茶色太陽眼鏡，戴得耐有可能見暈㗎！
以小記當日為例，配備40"LCDTV，坐距約5呎，本來係唔錯距離，點知戴上立體眼鏡之後，即時覺得環境暗咗；再過一陣，戲內一時出現前景立體，一時又出現後景立體，結果30分鐘後終於頂唔順，焗住轉番2D播放！除低副3D眼鏡都未完，因尚未適應原來光線，感覺刺眼，卒之雙眼要小休一會。
畫質係咪細膩得好交關唔重要，睇3D電影只求有立體感，雖然小記只欣賞咗30分鐘，但特別要讚某啲動作畫面超逼真，例如鋤頭直劈、腦漿爆射、子彈橫飛等鏡頭，感覺似脫離電視框框，加埋5.1DTS音響配合，隨時比一般驚慄片更驚慄。
礦場大屠殺
一次嚴重礦場意外導致多人死亡，最邪係當其中一人（夏利）突然蘇醒後，竟選定於情人節當晚進行大屠殺，並利用鋒利鋤頭把22人嘅心臟全部挖走！事件平息後十年，唯一生還者即係礦場東主位二世祖，佢重返舊地並打算將礦場賣畀大商家，點知……最嚇人嘅連環兇殺情節再活現眼前，究竟係咪夏利復活呢？
索女殘殺程式
荷李活拍過唔少連環兇殺案電影，最震撼當然係《德州電鋸殺人狂》，出過幾集之後仲拍前傳，直頭當系列作咁玩！但大家唔好對《血洗情人節》劇情抱太大期望，始終佢都係採用性感索女+核突殘忍呢個方程式，令各位驚慄片Fans煲完再煲，再者只不過係人、地、時轉變咗，驚嚇元素依舊，今回再加入全新3D元素，總算有個驚喜。
超立體恐怖位
Profile
碟名：《血洗情人節》
種類：驚慄片
語言：英文
字幕：廣東話/中/英
片長：101分鐘
音樂：5.1DTS
畫面：1.78：1
