近排天氣熱，大家上車都例必開冷氣，稍為停低時，擋風玻璃有時會鋪上一層薄霞氣，又或者遇上黃、紅、黑雨時，眼前似足個瀑布，完全阻擋視野。呢啲時候，水撥唔生性，撥極都唔清唔楚就大件事。我哋就嚟次撥水大比拼，搵出邊隻即使大雨下、都有本事撥一撥就即時睇得真眼前靚人靚景！
記者：梁美甜
攝影：林栢鈞
Model:Joanne
車輛提供：合誠汽車
教你揀
有骨耐用
汽車美容零件舖店主阿Yan教路：「水撥分有骨無骨，即係水撥中間有無鐵芯，以阿Yan經驗而言，有骨水撥質素高一點，可以撥得較為乾淨之餘，遇到大風或高速行車都無咁易吹起，亦安全得多。」當然，大家唔會下下要飛車，時下唔少追求汽車外觀嘅人，揀水撥一樣以靚為大前提，而呢一類水撥就多數屬無骨水撥嘞！
教你換
要識拉扯
唔係淨係嗌交會拉扯，原來裝拆水撥識拉扯都好重要。裝水撥好簡單，將水撥保持平衡插入，聽到「噠」一聲即成。而拆水撥就要學識呢三個步驟嘅拉扯動作。
要數最好水撥當然係隨車個原廠水撥啦，因為弧度同範圍，都係為該部車「度身訂做」，咁梗係可以最有效咁幫大家撥開水霧睇清前面啦。之不過用到咁上下，大約一年左右、又或者發現水撥撥撥吓會不時發出吱吱聲、又或者撥極都有水痕的話即係水撥嘅膠蝕咗，亦有可能係其他原因導致貼面性降低等，就係時候要更換。銀根鬆動咪返原廠又或者車房整，慳慳哋都可以DIY，尤其日本車，喺市面任何汽車美容零件舖問問，一般都可以搵到合適嘅水撥。據講以日本生產嘅質素較高，膠料較好之餘亦有較佳嘅貼面效果，最重要係較為耐用。
今次我哋搵嚟七款來自不同產地嘅水撥嚟次大比拼，測試方法係用大水喉造場人工雨，然後大按動一次水撥，睇睇經撥過嘅擋風玻璃上，水迹殘留嘅情況，搵出撥水力強又乾淨之選。
以★★★★★為最高評分
PIAA一撥無痕（c)
日本製，有骨，$178/件
乾淨度：★★★★★
測試中效果最好嘅產品之一，最貼玻璃面，而且一撥即時無水更無痕，但價錢亦係測試中最貴一款，始終係一分錢一分貨。
NEOBlade唔夠貼面（a）
韓國製，無骨，$88/件
乾淨度：★★★囗
殘留水珠，但唔算嚴重，基本上效果還可以，稍嫌唔夠貼面。
Pasco平價之選（a）
台灣製，無骨，$38/件
乾淨度：★★囗
價錢超平，但效果唔多理想，或者係無骨關係，效果欠佳貼面，用後玻璃面仍殘留有唔少水迹。
Bosch名牌有保證（c）
德國製，有骨，$208/對
乾淨度：★★★★
平均一件價錢一百蚊多啲，算係中等價錢，不過貴為名牌，質素點都有保證，測試結果亦顯示，效果唔錯。
CAW貼面效果佳（b）
日本製，有骨，$48/件
乾淨度：★★★★囗
價錢算相當經濟，日本製應該較耐用，膠片貼面程度相當高，一撥之下不留水迹，平靚正之選。
Yada搶眼平霸（b）
中國製，有骨，$48/對
乾淨度：★★囗
二十多元一件，測試產品中最平，更搶眼過人，不過就華而不實，唔貼之餘仲有大量水迹，效果麻麻，平都要諗一諗。
ShopList
a.威一系汽車用品（23843876）
b.PitStop（23958160）
c.盈威汽車用品（23079848）
日產Teana幫手試
今次借出擋風玻璃畀我哋左撥右撥嘅，係日產嘅Teana。作為房車，Teana車身唔細，三廂式五座四門載人載物多。行車時車廂超靜，外形穩重但起步加速一啲都唔笨重兼加幾分瀟灑。皮椅又附有冷熱透氣功能，冬暖夏凉，揸得舒服。最抵讚係今次揸足幾日，踩足百多二百公里，仲要無時無刻冷氣開唔停，但油錶指針未到一半，都算好慳油！
規格
引擎：2,495ccV6
馬力：182ps/6,000rpm
扭力：23.3kgm/4,400rpm
傳動：XTRONICCVT
查詢：合誠汽車（28035333）