六月二十一日本欄講「捐助正生」，引來讀者反應，來電郵詢問如何捐款，其實左丁山在呢宗新聞發生之前，不知「正生」為何物，對「正生」全無認識，老友話要捐錢，問左丁山問到唔識答。好彩一位讀者Hugo用電郵告知，上網www.drugrehab.com.hk就可查到。於是上此網站，原來就係「基督教正生會」網站，英文叫做ChristianZhengShengAssociationLimited，校長陳兆焯，係中文大學教育學院校友。網站列明陳校長電話：2984-9152，9307-1102，捐款支票以「基督教正生會有限公司」或ChristianZhengShengAssociationLimited為抬頭人，寄回長洲郵政信箱68號，註明寄款人姓名地址，以便「正生」寄回收據。又可以存款入滙豐銀行戶口493-1-004362。如果要好穩陣，最好先打個電話到教育局、社會福利署查詢「正生」可否收受捐款，或者直接打電話問清楚陳校長，一位教育界人士講，正生有唔少錢用於內地方面。
「正生」遷往梅窩一事，未必成事，《文匯報》論壇已發表文章支持梅窩居民，民建聯議員張學明係鄉事派，為咗鞏固選票票源，會幫邊個，大家唔使估啦。當今NIMBY心態盛行，「正生書院」搬去邊都會有人嘈：特區政府官員呢幾年嚟好怕區議會與報紙頭條，做事係為咗應酬區議會與報紙嘅，而唔係要做得成件事嘅，凡有可爭議之事，都係話：「政府唔反對。你先諮詢區議會啦」，區議會肯定反對將一啲帶有負面性質嘅設施搬到本區，例如精神病院、殯儀館、焚化爐、愛滋病療養、戒毒所等等，要諮詢就可能建設不成或曠時日久，特區政府官員於是可以慳番啖氣，照支人工。馬會就俾政府玩殘多年，投注站數目始終無法增加，而非常急切需要嘅高科技焚化爐始終落實無期。
「正生書院」之要擴充，搵大啲嘅校舍，顯示咗本港學生吸毒狀況日趨嚴重，近月傳出之學生索Ｋ新聞層出不窮，學校根本無力防止，無怪黃仁龍司長披掛上陣反吸毒，希望有力回天啦。肥仔Ｋ話佢以前在倫敦讀書時，大學門口就有人賣軟性毒品，從來冇學校保安或警察干涉，希望香港唔會變成咁樣。