黃長發和富商三奶李姿霆（Karen）拍拖半年，月前終分手。不過，黃長發和Karen分手後不愁寂寞，昨午記者便發現長發陪契媽Christine食晏，甚至陪契媽返其擎天半島香閨。
昨午3時半，戴上cap帽的長發獨自現身圓方，見他四圍望似是搵路，然後走進Stormies餐廳，原來他約了契媽Christine午膳，其間見黃長發手舞足蹈講個不停，二人在餐廳逗留了一小時後離開，由契媽埋單。見契媽不慎凸點，未知是冷氣太凍還是被長發的甜言蜜語打動到毛管戙？
之後長發陪契媽到豐澤買手提電話，其實長發和Karen也常在圓方拍拖，也曾經先到Stormies餐廳再到豐澤，莫非長發在緬懷與Karen的拍拖時光？揀了近一小時後，契媽終揀了一部手提電話，黃長發再陪契媽返擎天半島傾偈。其間，黃長發發現契媽凸點後，竟打雀咁眼望住契媽胸部，不過契媽就若無其事繼續邊行邊與他講話，認真open。
Karen直言唔開心
對於長發和契媽結伴去街，Karen昨在電話說：「唔開心都冇辦法。」她表示已沒再聯絡長發，也懶理他的事，但與其契媽卻偶有聯絡。
此外，曹敏莉昨日在九龍灣出席活動，被問到黃長發和Karen甩拖時說：「冇留意新聞，呢啲係佢哋私人感情事，唔方便畀意見，佢哋係局內人，我哋只係旁觀者，如果兩人有問題而分手都好。」有指長發貪錢，她則力撐長發：「佢好乖，好簡單，絕對唔係唔好嘅男仔。」
採訪、攝影：楊浩賢、顏英儀
