天文台前台長林超英退休後閒雲野鶴，八方噚日見到佢，話題先從近日打風開始，點知講唔夠半句，林超英就話唔講關於天氣嘅嘢，因為佢已經大半世睇天做人，家陣退咗落嚟，不在其位，貿然講嘢對現任台長唔係幾好，搵佢講一個世紀前嘅天氣就冇問題，因為講歷史就可以暢所欲言。
無官一身輕，林超英畀新卡片八方，上有「草雲居」三個字，係佢書齋同個人網誌嘅名，聽來十分有詩意。林超英愛引經據典，blog名果然有得解，據佢解釋，草在地，雲在天，呢個名字有頂天立地之意，家佢自號草雲居主人，自言少年觀星，成年觀雲，閒時觀鳥。詩聖杜甫曾居草堂，寫下不少名詩，林超英則在書齋寫blog，有興趣可看看， http://tiandiyouqing.blogspot.com/。