差人軟化今日唔上街，改為在警察總部開員工諮詢大會，破天荒請來一哥出席。除咗鄧竟成，警隊兩位副處長曾偉雄、任達榮好似亨哈二將咁陪伴左右，不過一哥出場係大騷，三人行都未夠氣勢，八方聽聞任達榮已發出內部通告「吹雞」。
指示總警司級出席
據八方了解，任達榮指示各環頭總警司級以上人員，今日冇乜特別事幹嘅話，最好就去警察總部亮相，聽吓各級夥計意見，對增進上下溝通、完善警隊管理有好處云云。二哥要人，一眾環頭指揮官紛紛相約同袍今日去撐場，如果其他人都去，自己唔見人好醜怪㗎嘛。
一哥開騷大玩晒馬，有警員笑言係押重注，「如果10月職系架構檢討冇好消息，一哥都好麻煩。」諮詢會在警察總部8樓舉行，由於預計今日有幾千人到場爭睹一哥風采，故已預留10樓作現場直播。有人譏笑警員唔遊行改開大食會圍威喂，知情人士則話今日冇準備食物，「要食飯嘅自己搞掂。」