銀行存款息率實在太低，搞到唔少自命守規矩之銀行存戶都搖身一變成為「潮流散戶」，開始試試炒股，希望可以博取較高回報。不過，所謂高風險、高回報，炒股同純儲蓄明顯係兩回事，儲錢即使真係衰到極，最多都係無利息收，炒股就唔同，萬一上錯賊船，隨時輸身家。
呢輪「潮流散戶」最興抽新股，所以夠晒「人氣」的霸王國際（1338）梗係超額認購幾百倍。如果「潮流散戶」一心想買股收息，市場上都有唔少選擇，剛公佈業績嘅莎莎國際（178）即係其一，事關莎莎派息一向十分慷慨。截至今年3月底全年純利3.16億元，同比下跌9%，每股盈利0.229元，派發末期息連特別股息0.17元，中期息連特別股息已派0.06元，即全年股息0.23元，即賺幾多就派晒畀股東。睇番紀錄，該股連年派息亦好穩定，如果純從收息角度衡量，真係不錯嘅選擇。
莎莎業務再唔係困於港澳，而係逐步北上內地市場開店，集團期望2011年3月底前，內地銷售點可大增至115個；目前在港澳地區則有62間化妝品店。去年集團零售及批發業務整體毛利率提升至43.7%。莎莎進可攻、退可守，近日股價已見強勢，昨日收2.89元，升5%，股息率有近8厘，可逢低吸納作中線投資，獲利目標3.80元。
方星俠