警察大遊行未出發先取消，一場雷聲大嘅工運被消滅於青瓜狀態，變成棉花糖收場，保持社會和諧，可見鐵漢都有柔情一面，符合一半港男唔夠硬呢個事實。身在新加坡嘅港男、行會召集人梁振英，前日知道差佬軟化後，即刻在自己個Blog上表示歡迎。
振英父駐守港督府
喺警察上街呢件事上，梁振英明顯唔想大家做青瓜，上周末已呼籲差人遊行前要顧及社會和諧穩定；家陣差人變成棉花糖，梁振英第一時間回應事件，八方相信又有人諷刺佢抽水，平時咁講，八方唔會反對，今次卻要為振英哥講句公道話。
大家應該記得，早兩日差佬來勢洶洶要上街時，煲呔忽然打感情牌，話自己來自警察世家，爸爸、細佬、弟婦、叔叔同表兄弟都係警察，所以佢好明白自己人感受，有人認為全靠煲呔動之以情，卒之令差人打消上街念頭。
戲都有得做，着得起件制服就係自己人，煲呔有個人民公僕父親，咁啱得咁蹺，梁振英爸爸都係差人！煲呔曾經在荷李活道警察宿舍居住18年，由細同差人、警察家庭玩到大；梁振英都有相似成長背景，據佢在個人網頁自述，佢讀荷李活道警察小學，升中讀英皇書院，攞到警察部五年獎學金。
煲呔做特首後先遷入禮賓府，梁振英則由細喺度玩到大，因為佢爸爸做警察時長年駐守港督府，所以梁振英未做CY仍然係英仔時，已經成日有機會靜靜雞走入去港督府警崗後花園玩，至於佢當時是否已經立下宏願，誓要回來，外人不得而知。
警察軟化感覺欣慰
既然大家都係來自警察世家，煲呔話自己同警隊有極度深厚感情，好明白警察訴求，振英哥何嘗不理解警員心情？難道他與警察就冇情感上嘅交流？所以，對於警察軟化唔上街，八方相信，振英哥內心係覺得十分安慰嘅。
商人治港行不通，話唔定阿爺就係睇中煲呔警察世家呢個背景，時來風送輪到公僕上位，咁振英哥行情就更高漲嘞，佢喺Blog度引述覺光法師說話，「做大眾的事，總會有人說你，不用害怕，只要行的是正道便好。」
mailto:[email protected]