上星期先結婚做咗張太嘅洪欣，前晚婚後首次露面，拖住27歲嘅內地演員老公仔張丹峰，喺金鐘出席上市公司酒會，其他嘉賓仲有葉翠翠、任達華同琦琦夫婦、胡敏珊、李麗珊及楊洛婷等。
曾被稱為「港姐股神」嘅葉翠翠，被踢爆唔精於股票後，前晚都唔敢再講，問佢樓市小陽春同股市嘅情況，佢一律話唔知：「我之前返咗內地拍旅遊節目，脫咗節半個月，所以冇check，乜都唔知。」
洪欣搵電燈膽度蜜月
至於洪欣就話老公太忙，到家仲未去度蜜月：「想8月去囉，想去希臘、峇里之類，都係陽光與海灘，如果佢真係太忙，就馬來西亞都好。今次應該同仔仔（莫鎬廉）一齊去，三人行，或者叫埋啲朋友一齊。」蜜月都成大班人，老公唔會詐型咩？洪欣話：「我哋成日都二人世界，多人仲好玩啲。」
同場嘅任達華、琦琦同胡敏珊等獲大會頒發環保之星，仲每人送咗10萬股公司股票，約值7萬幾蚊。胡敏珊話唔會賣住，希望將來升到20萬，可以用嚟捐錢做善事，助養多啲小朋友，佢話：「我家助養咗60、70個小朋友，目標係100萬個！」