7.1大遊行走了三年又三年，今年有大批年輕人準備加入，以「腦」力、活力，接力爭取雙普選。他們組織了「香港投訴合唱團」，將市民不滿譜出《土炮投訴歌》，近日密密練唱，將在7.1當日到維園將民怨「唱通街」。港大女生陳巧文也跟Mylittleairport主腦阿P合力炮製新曲《聲援曾蔭權》，撐他記緊要跟香港人「玩鋪勁整個雙普選」。 記者：雷子樂
從疾呼「平反六四」到「還政於民」，香港遊行示威離不開叫口號；新一代則喜愛把心聲一一唱出來。24歲的方韻芝（Vangi）和鄭惠森（Haze）花了大半年時間，將源於芬蘭，早已傳到在世界多個城市的「投訴合唱團」引入香港。「唔同城市嘅人有唔同不滿，好似芬蘭有人投訴點解手機成日咁快冇電」。
歌詞抵死到肉引共鳴
這半年內，她們四出做展覽，在中區、旺角收集市民的「投訴」，再細心分類，與一班志同道合的年輕人共譜出《土炮投訴歌》，「喺旺角嗰日好多人叫政府減煙稅，早一日曾蔭權啱啱喺立法會講錯嘢，都好多人投訴」。歌曲面世後，本月初吸引到大批素未謀面的年輕人，在周六及周日出席綵排、上「補習班」練歌。
「星期六要上班的城市需要改變！星期日也要上班的國家需要革命！請假啦各位！」過癮的網上動員，吸引到大批20世代的年輕人一起高唱：「點解點解永冇放工，點解點解老細冇用」、「煲呔亂噏智慧冇乜，官商掛勾（鈎）普選再擇日」、「CCTVB最快最新 事事旦旦無法過問」……歌詞不用句句盡符音韻，寫得抵死到肉更易引發共鳴。長達3分半鐘的投訴歌，唱盡施政失誤、打工仔壓力、港男港女矛盾，以笑聲對抗「河蟹」。
今明兩日，他們會盡最後努力練歌、修改歌詞，準備7.1當日，把投訴歌發揚光大，在維園的台上、在爭普選的征途裏，邀請市民一起獻唱。Vangi說：「我哋係想makeachange。普選可能很遠，至少有目標，慢慢去做」。Haze雖然不太關心政治，但也認為香港人應該有普選。「（遊行）唔可以唔做，因為唔做就一定冇機會」。
陳巧文譜歌揶揄特首
22歲的港大女生陳巧文也跟音樂人何山、阿p合力炮製了歌曲《聲援曾蔭權》，希望令年輕人感到政治並不沉悶。「聲援曾蔭權，玩鋪勁整個雙普選」、「聲援曾蔭權，成龍狗噏自由等於亂」……陳巧文笑說，曾蔭權一再拖延普選，「好似細路話唔聽，咪作曲歌嚟吓佢」。
03年，16歲的陳巧文剛由英國返港，跟父母參加7.1大遊行。「嗰時反23條最逼切，普選訴求都好清晰」。但雙普選由07、08拖到最快2017、2020，年輕人都不耐煩。「嘩，等到2017我都成30歲，到時又會唔會拖到2047呢？我啲外國朋友，已經開始投票選總統啦！」
從爭取88直選到今天2009，香港的民主路在97回歸後出現倒退，「普選每推遲一年，就係剝削我哋嘅自由多一年！」陳巧文知道，邁向普選是一條漫漫長路，不斷吸納年輕人參與，相當重要。她說，每年7.1，無論烈日或暴雨，花兩、三小時，到維園出一身汗、辛苦一次，已成為香港人最起碼的責任。「如果大家只顧住搵錢，覺得（民主）冇可能，咁就唔會有機會。」
《土炮投訴歌》（節錄）
曲、詞：投訴合唱團
點解點解永冇放工點解點解老細冇用
午飯晚飯搭車貴 到糧尾窮到穿窿
要納稅冇得免
天星鐘聲冇晒記憶 西九諮詢冇晒意義
喂冇晒平價樓買 叫呀伯呀嫲種金
發達咪賣良心
煲呔亂噏智慧冇乜官商掛勾普選再擇日
要是我沒有工見 以後我就要揸兜
克勤要tryyourbreast！
CCTVB最快最新 事事旦旦無法過問
報導缺實欠公理 當我係傻要我睇
連篇大話嚇死你
點解高官猛咁廢噏 政黨呃票冇句老實
點解澳門有錢派 香港冇最低工資
強積金去晒邊？
（普）背靠祖國面向世界 Wewannamakeachange
其實我c-o-m-p-l-a-i-n 我地嚟做啲咩 嚟唱歌
我要話你 我要話你 Wewannamakeachange
其實我c-o-m-p-l-a-i-n 我地嚟做啲咩 嚟唱歌哦~
《聲援曾蔭權》（節錄）
唱：陳巧文
曲：何山、阿P
聲援曾蔭權！
玩鋪勁整個雙普選！
聲援曾蔭權！
玩鋪勁香港唔怕亂！
聲援曾蔭權！
成龍狗噏自由等於亂
聲援曾蔭權！
中國人無人管點樣算？
雙普選！！
雙普選！！
雙普選！！
我哋要雙普選！！
7.1前綵排時間*：
日期時間：6月27日、28日1至3時
地點：兆基創意書院音樂室
*歡迎公眾加入
參考網址： http://hkcomplaintschoir.blogspot.com