Moonwalker王者哀歌之永誌傳奇--一代樂壇傳奇米高積遜（MichaelJackson）突然去世，消息震驚全球，米高的離去不但令成千上萬的歌迷心碎，樂壇更失去一位舉足輕重的代表性人物，昨日譚詠麟（阿倫）及王傑等齊齊開腔悼念這位一代巨星，相信米高將會永遠留在歌迷的心中。 撰文：丁寧
譚詠麟遺憾從未能見一面
聽到呢個消息梗係唔開心，姑勿論外界評論，佢始終係一個帶領潮流、付出好多嘅歌手。其實佢搞演唱會好好反應，佢可能好想做一場好嘅演唱會，但壓力太大，心臟負荷唔到。我真係好懷念佢黑色膚色時，當佢有自己生活時，就一定會有好多傳媒追訪，咁唔開心都係正常。一個人去到咁高位就一定有人攻擊，好可惜冇見過佢。
王傑原定下月英國睇騷
我正準備應英國幾位好朋友之邀，下月飛去英國睇MJ演唱會，今晨喺網上睇到MJ突然去世消息，成個人呆晒，呢位巨星殞落係世界樂壇巨大損失，我已同英國朋友聯絡，請佢哋一定要幫我保存張入場券留作紀念。
任賢齊讚貢獻不遜科學家
Michael係一個傳奇，佢曾經擁有全世界，但又試過俾全世界圍攻。明明憑自己魅力非凡吸引全世界，最後又將自己隔離，真係好感謝佢為這個世界帶來過精采嘅moonwalk同音樂。佢嘅音樂同表演曾經為億億萬萬人精神上帶來很多歡樂，呢啲貢獻絕不低於任何科學家。
許志安台灣開騷緣慳一面
今朝喺台灣機場嘅電視上睇到呢單新聞，個心好難過，手提電話不停收到外國朋友畀我嘅短訊。早年MJ去台灣做演唱會，當時我同蘇永康、梁漢文同張衞健一齊買晒飛準備去捧場，但後來因為媽咪身體唔舒服，最後錯過佢嘅演出。本來仲準備今年佢巡迴我會飛去睇，家永遠冇呢個機會。
張繼聰體會MJ壓力過大
今早收到呢個消息個心好唔舒服，前日我先為電台做節目，仲係講MJ嘅歷史同音樂。MJ對樂壇貢獻好大，其實呢10幾年MJ所承受嘅壓力好大，唔係普通人可以想像到，希望佢喺天堂安息。以前我賺外快做表演，我都成日扮MJ跳舞，今日我仲去買佢嘅T恤同《TheWiz》呢套戲。
蔡卓妍世界舞王冇人能及
我一聽到呢個消息好震驚，冇咗一個巨星，MJ真係為全球樂壇作出好大嘅貢獻。我覺得佢係全世界跳舞最好嘅男歌手，我真係好懷念佢喺台上嘅演出，MJ嘅地位冇人能及。
李燦森開P播歌作出致敬
我哋今晚（昨晚）開party時，都會播MJ啲歌同佢致敬，佢嘅離世都有少少可惜，不過呢個係人生必經階段，而且MJ都walk咗人生大半。
劉美君風格獨特容易早逝
MJ係好獨特嘅歌手，佢細個唱歌時已經令人好感動，咁多年嚟未試過聽佢唱歌唔好聽，到家都冇人把聲似佢，佢跳舞又特別，有自己風格，咁有獨特風格嘅歌手好多早逝。
曹格自定6.26做紀念日
可能上帝真係太愛佢啦，所以要咁早帶佢走，雖然我有儲齊MJ演唱會嘅DVD，我希望大家可以為佢完成夢想，而且我仲會將昨日（26日）定為「MJDay」。
特稿
為黑人打開世界之門
米高積遜的影響力超出樂壇並遠至全世界。資深音樂人指他如電影般的MV、集體舞的表演在80年代震撼樂壇，為黑人歌手打開世界門戶，成功促成社會文化共融。
音樂文化人黃志淙指出，米高積遜崛起時「MTVChannel」剛面世，他在音樂MV中的集體舞表演震驚樂壇，更破天荒將音樂MV拍成如電影般的20分鐘長片，又邀請馬田史高西斯（MartinScorsese）等著名導演拍攝，樂迷由黑人伸延至白人，歌曲及形象推廣至全世界。
影響不局限樂壇
80年代中期，非洲的饑荒問題嚴重，米高積遜有份合唱的一曲《WeAreTheWorld》，為非洲籌款，影響力不再局限於樂壇。中文大學新聞與傳播學院副教授馮應謙表示，70、80年代美國主流樂壇仍是白人天下，米高積遜能以黑人身份晉身流行音樂icon，改變社會上很多人的思維，「當時有啲白人坐巴士，仲係唔想坐黑人隔籬。」米高積遜的崛起間接促成社會文化共融，令黑人各方面也更為社會接受。
撰文：張文傑