港府日前突然要求立法會經濟事務委員會下周二開特別會議，呢個特別會議特別之處係冇文件、冇議程，十分神秘，議員要睇傳媒報道先知係有關迪士尼注資安排，官方解釋因行會當日上午才開會討論，所以一切都要保密。
唔少議員對於政府呼之則來態度好不滿，泛民噚日在立會內務委員會上發炮，公民黨湯大狀大鬧政府當議員冇到，民主黨主席仁哥矛頭直指經濟事務委員會主席林健鋒，恥笑佢向官員跪低，似乎想話佢係林公公。
林健鋒做得保皇黨，有辱無榮亦無可奈何，強調因為政府要求佢保密，並非蓄意隱瞞，議員要求內會主席劉健儀向政務司司長唐公子表達不滿，下不為例咁話。