隔牆有耳：湯主教帶領鴨仔團 - 李八方

天主教教區主教湯漢上任兩個月，噚日請咗大班記者去佢所住嘅聖神修院望彌撒同食飯，之後仲做埋導遊，帶住記者鴨仔團遊修院。
聖神修院參考中國宮廷設計，比起中環教區中心宿舍開揚好多，難怪湯漢唔捨得搬。佢第一個向記者介紹嘅就係一個叫「和平可期」嘅雕塑，八方同埋其他行家一睇，嘩！乜咁似高志活作品國殤之柱嘅！聽湯主教講，呢個雕塑係出自西方藝術家手筆，呢位藝術家1970年將作品送來香港，在康樂大廈一個教會大型展覽中展出，不過展覽後無處容身，聖神修院於是收容埋。
原本銀色嘅雕塑日曬雨淋，一年就生晒銹，於是修院幫佢塗上黑漆，效果就好似未油橙色嘅國殤之柱咁。國殤之柱擺喺邊成日都好多爭拗，既然教會咁多地方，日後真係無路可走，都可以諗吓搬去修院。