自從海洋公園主席盛智文上任後，公園搞得有聲有色，力壓過江龍迪士尼，政府噚日宣佈再畀佢做主席多三年，任期由下月起至2012年6月底。
政府委任公職有所謂「六六制」，即係同一人不應做一職位多過六年，以及不應同時擔任超過六個公職，盛智文03年起做海洋公園主席，至今六年，今次係破格安排。官場人士指盛智文成績有目共睹，而且海洋公園多項擴建工程如火如荼，盛智文留任利多於弊。
有政界人士認為今次係煲呔還人情債，事關盛智文入行會中空寶，所以畀返個安慰獎佢。此外，當局委任港大海洋生物專家薛綺雯（YvonneSadovy）下月起做海洋公園董事局成員，任期兩年，唔通要教如何養中華鱘？