20年前嘅事，人民不會忘記，20年來唱過嘅歌，我哋記得好清楚。有人向八方報料，指環球唱片正密鑼緊鼓製作一隻民運歌曲精選唱片，被形容係本地樂壇上接廿年前民主歌聲獻中華，繼承英烈志，低調悼念六四，暗示曾蔭權不代表我嘅港人心聲「代表作」，呢隻精選CD，7.1前出街。
悼念六四死難者心曲
環球指呢隻名為《田》嘅精選CD係「熟悉的老朋友…我們都感動的歌…字字有淚！」共收錄17首歌，有幾首係絕版，包括梅姐《四海一心》、盧冠廷《漆黑將不再面對》同夏韶聲《媽媽我沒有做錯》，見到呢幾個歌名，大家諗起咩呢？
梅姐89年喺民主歌聲獻中華上唱《四海一心》，呼籲香港人支援北京民運嘅畫面，八方相信唔少人歷歷在目，而《漆黑將不再面對》同《媽媽我沒有做錯》，在好多人心目中，已經係悼念六四死難者嘅心曲，聞者心酸。
其他歌有達明《天問》、Beyond《長城》，又有憶蓮嘅《破曉》。關於呢首歌，有需要作個註腳。91年憶蓮開個唱，特別將《破曉》同《前塵》重新編排成《破曉前塵夢》，當年好多人心領神會首歌在影射六四、悼念死難者，連呢個「密碼」都冇遺忘，揀歌嘅應該係有心人。
《田》監製朱先生則強調精選CD選曲只係「慘情歌」，外界認為有政治含意或悼念六四係「太敏感」，「只係普通慘情歌精選，無咩特別。」精選所謂「慘情歌」都同六四有關，又在6月推出，真係純熟巧合？
據朱先生稱，年初已有推出「慘情歌」精選碟構思，由於6月冇乜新碟，逐趁空檔出街，「做生意啫」，佢話冇考慮過六四效應，亦冇特別大賣廣告，估計銷量約幾千張，與一般精選唱片差唔多，「呢啲精選碟，總有一撮人買。」
《田》部份絕對推介歌
四海一心 梅艷芳
漆黑將不再面對 盧冠廷
歲月無聲 Beyond
媽媽我沒有做錯 夏韶聲
舞吧舞吧舞吧 黃耀明
mailto:[email protected]