自問衰人，以貌取人，卻也未能一眼便看得出雪晴的底蘊。媽咪連太懷孕至9個月，才得悉將誕下一個唐氏綜合兒，突如其來卻沒太大打擊，兩夫婦當她是神的禮物，還毫不介意讓別人知道，反而積極搜集資料選學校及各種活動鍛煉身體，甚至爭取比正常小朋友更多的學習機會。8年總結：每日都是開心日，更譜寫出一張沒半點自我標籤的天使臉孔。
記者：林佩婷
攝影：陳盛臣
鳴謝：太古城中心冰上皇宮（28448688）
雪後天晴
未懷孕時，兩夫婦已決定生女的話會叫雪晴。「記得有次去仙台旅行落大雪後，天氣晴朗，映照到啲雪好靚。到個女出世雖然有啲缺憾，但就好似雖下大雪卻有晴天咁。」
無時間傷心
「雪晴出世後，我哋無時間傷心就即刻接受事實。」猶幸女兒只屬輕度智障，內分泌雖有問題，但食藥就能控制，身體算健康。爹哋於是積極摷料，聯絡唐氏綜合症協會、協康會等等，跟姑娘學習訓練技巧，從初生四五個月就開始，好似用毛巾輕蓋臉龐讓她學識拎走塊布，還有物理治療等，積極撥亂反正。再大一點，溜冰、彈琴、跳舞，「我哋覺得反而應該俾佢更多接觸外面世界，佢一出世就返教會，一有時間就出國旅行。」經過兩夫婦努力，雪晴不但能用完整句子表達，且不時講笑話、謎語，令父母最窩心就是成日講一般人都吝嗇的我愛你。
孟母一遷
連太一家本住愉景灣，在東涌的協康會度過幼稚園歲月，後來因雪晴讀書問題，毅然搬屋。「到佢要升讀小學，打去教育局問，點知屋企附近唔會開特殊學校，提議雪晴讀正常小學，但我覺得長遠嚟講都係讀特殊學校對佢成長有幫助，於是自己周圍搵，最後見到南區間學校校長記得晒所有同學名，小息時個個攬住佢唔放，就叠埋心水賣屋租住堅尼地城，仲專登就番校車尾二個站，等佢返學放學更方便。但最搞笑係見佢放學個頭成日瘀，初時以為佢俾同學打，點知原來放學會由最頭兜返尾，車程成個幾鐘，佢可能瞌眼瞓撞瘀咗，最後都要工人姐姐湊放學。」
1.學了年多溜冰，鍛煉大腿肌肉及平衡，協助上落樓梯。
2.學業成績不是最出色，但處理家課認真而工整。
3.物理治療令四肢變得更有力，在家則會陪她踩電話簿或上落樓梯。
4.學琴雖不懂讀譜，但老師逐句教也彈到幾首飲歌。
5.看似簡單的技能兩夫婦都要示範多次，最終希望女兒學懂獨立生活。
遲知的幸福
看似樣樣作好打算，原來他們也曾有驚慌失措的一刻。連生連太懷雪晴時正年輕，醫生勸不用做測試檢查以免反增風險。懷孕9月，連太有日身體檢查時，心血來潮問一句BB有幾重，就打開驚慌的序幕。「醫生Check完話BB好似輕咗啲，最好搵多個醫生Check，第二個醫生又話胎水同心跳唔多好，最後寫紙去醫院檢查。當時好擔心，因為已經9個月又唔知咩事！醫生只係話胎水好少，要決定係咪即刻開刀，成個過程無人講到畀我知究竟發生咩事，一開刀生完又即刻抱走BB，淨係話有啲問題，睇寶麗萊見佢插晒喉仲以為手腳有事，等我落得床老公先話我知。最初梗係傷心，但事實已經發生，即使一早Check到有問題，只要BB無生命危險，我最終都會選擇生出嚟。仲安慰自己好彩，臨生先知有問題，唔使白白早擔心幾個月。」
深信出門見多些人有助腦部發展及說話技巧，一家三口足迹遍天下。
《天下父母心．障無不勝》
想更加了解雪晴一家的生活點滴，可於明天（28日）晚上7:30在亞洲電視本港台觀看由教育局及衞生署贊助的港台節目《天下父母心》。
網址： http://www.rthk.org.hk/special/parenting2009
